QR Parlamenti Senatynyń Tóraǵasy Máýlen Áshimbaevtiń Ózbekstanǵa sapary barysynda eki eldiń parlamentaralyq yntymaqtastyǵyn damytýdyń 2021-2022 jyldarǵa arnalǵan jol kartasyna qol qoiyldy. Bul týraly M.Áshimbaev Facebook-te jazdy.
«Shet eldermen parlamentaralyq yntymaqtastyqty nyǵaitý – Senat jumysyndaǵy negizgi basymdyqtardyń biri. Bul baǵyt Memleket basshysynyń da únemi nazarynda ekeni belgili. Osyǵan orai búgin resmi saparmen Ózbekstan Respýblikasyna keldim.
Qazaq pen ózbek tamyry bir, tarihy ortaq, týysqan halyqtar. Sondai-aq, Ózbekstan búginde Qazaqstannyń tek Ortalyq Aziiadaǵy emes, álemdik qaýymdastyqtaǵy senimdi strategiialyq seriktesi jáne odaqtasy. Dostyq pen baýyrlastyqqa negizdelgen mundai tyǵyz qarym-qatynastyń qalyptasýyna Qazaqstan Respýblikasynyń Tuńǵysh Prezidenti – Elbasy Nursultan Nazarbaev zor eńbek sińirgeni belgili», - deidi Senat spikeri.
Áshimbaevtyń aitýynsha, qazirgi tańda qos memlekettiń basshylary Qasym-Jomart Toqaev pen Shavkat Mirziioev osy sabaqtastyqty saqtaýǵa basa mán berip otyr.
«Sonyń nátijesinde qazaq-ózbek bailanysy barlyq salada jańa biikke kóterilýde. Atalǵan yntymaqtastyqty odan ári órkendetýge Parlamentterimiz de óz úlesterin qosyp keledi.
Sapardyń alǵashqy kúninde Ózbekstannyń Olii Májilis Senatynyń Tóraǵasy Tanzila Narbaevamen kezdestim. Kezdesý barysynda ekijaqty qarym-qatynasty kúsheitýde Parlamentterimizdiń, onyń ishinde Joǵarǵy palatalardyń atqaratyn róline toqtaldyq. Saýda-ekonomikalyq jáne mádeni-gýmanitarlyq bailanystardy damytýdyń mańyzdy tetikterin sóz ettik. Bul salalarda eki eldiń áleýeti óte zor. Sondyqtan aldaǵy ýaqytta osy baǵyttar boiynsha birlesip atqarylatyn jumystarǵa zańnamalyq turǵydan qoldaý kórsetýdiń bereri mol bolady dep esepteimiz», - dep jazady Senat tóraǵasy.
Málim etilgendei, kezdesý barysynda, sondai-aq eki eldiń Senattary arasynda parlamentaralyq yntymaqtastyqty damytýdyń 2021-2022 jyldarǵa arnalǵan jol kartasyna qol qoiyldy. Qujatta ózara bailanysty damytatyn naqty sharalar qamtylǵan. Soǵan sáikes, aldaǵy ýaqytta óńiraralyq qarym-qatynasty keńeitý, ekologiialyq problemalardy, onyń ishinde Aral teńizine qatysty máselelerdi sheshý, týrizmdi damytý, investitsiia tartý jáne basqa da baǵyttar boiynsha birlesken bastamalar qolǵa alynbaq.
Qazaqstandyq delegatsiianyń Ózbekstanǵa sapary aiasynda erteń taǵy birqatar shara josparlanǵan.
