Afrika elderiniń birinde halyqaralyq volonter bolyp júrgen Ainur Ábsemetova jumysy jaiynda aityp berdi, dep habarlaidy QazAqparat.
«2,5 jyl boiy Malavide turyp, halyqaralyq volonter retinde jumys istedim. Malavi - ómir súrý deńgeii tómen shaǵyn ǵana afrikalyq el. Ol álemniń eń kedei 10 memleketiniń qataryna kiredi. Bul elge Qazaqstandaǵy BUU-nyń Damý baǵdarlamasy shaqyrǵan edi. Maǵan elde júrgizilip jatqan genderlik teńdikti damytý jónindegi baǵdarlamany baǵalaý úshin tehnikalyq-saraptamalyq kómek kórsetýdi ótingen bolatyn. Jalpy, Malavide Genderlikti teńdikti damytý ministrligi jumys isteidi», - dedi ol.
Onyń aitýynsha, Malavide genderlik baǵdarlamasyn júzege asyrý úshin qarajat bólinip, is-qimyl jospary belgilengen. Bul rette qazaqstandyq volonter atalǵan baǵdarlamasynyń júzege asyrylý tiimdiligin baǵalap, indikatorlaryn ázirleýmen ainalysady.
«Malavige anammen jáne balammen bardym. Shynyn aitqanda alǵashqy kezde qiyndaý tidi. Olardyń ortaǵa beiimdelýine qamqorlyq tanytý, ózderin jaily sezinýleri úshin qaýipsizdigin qamtamasyz etý qajet boldy. Qiyndyqtarǵa qaramastan beiimdelip kettim. Barlyǵymen birdei eldiń búkil óńirin aralap, shalǵaidaǵy aýyldarynda boldym, baǵalaý júrgizdim. Buǵan qosa anam men ulyma da kóńil aýdarýǵa tyrystym. Sebebi ol kezde anam aǵylshyn tilin endi ǵana úirenip júrgen edi. Eń qyzyǵy anam da sol jaqta volonter bolyp, jergilikti áleýmettik az qamtylǵan otbasylardan shyqqan balalarǵa toqyma toqýdy úiretti», - dedi ol.
Qazirgi ýaqytta «Shekarasyz dárigerler» uiymynda jumys isteitin Ainur Ábsemetova taiaý kúnderi Mianmaǵa attanbaq.
.jpeg)