Qazaqstannyń Qyrǵyzstandaǵy Elshiligi qyzmetkeriniń qatysýymen bolǵan keleńsiz jaitqa bailanysty qyzmettik tekseris júrip jatyr. Bul týraly búgin ótken brifingte QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat.
«2020 jyldyń 10 qańtarynda memlekettik shekaranyń «Aq jol» - «Qordai» baqylaý-ótkizý pýnktindegi Qyrǵyzstan jaǵynda Qazaqstannyń Qyrǵyzstandaǵy Elshiliginiń ákimshilik-tehnikalyq personaly qyzmetkeriniń qatysýymen oqiǵa oryn aldy. Qazirgi ýaqytta qyzmettik tekserý júrip jatyr. Onyń nátijesinde tiisti shara qabyldanatyn bolady«, - dedi Aibek Smadiiarov,
Onyń aitýynsha, Qazaqstan Elshiligi qyzmetkeriniń kóliginde otyrǵan áiel elimizdiń syrtqy diplomatiialyq korpýsynyń qyzmetkeri emes. Ol diplomatiialyq nómiri bar Elshilik qyzmetkeri basqaryp kele jatqan kólikte otyrǵan.
«Elshilikke onyń esh qatysy joq. Qazir onyń diplomatiialyq kólikte nelikten otyrǵandyǵy anyqtalyp jatyr. Nátijesin qosymsha jariia etemiz. Ol Qyrǵyzstan aýmaǵyndaǵy bir is boiynsha kúdikti. Oǵan sol elden shyǵýǵa shekteý qoiylǵan», - dedi resmi ókil.
Aibek Smadiiarov Elshilik qyzmetkeri tutqynǵa alynbaǵandyǵyn basa aitty.
«Ol – Bishkekte. Keibir BAQ habarlaǵandai, ol tutqynǵa alynǵan joq. Tek kóligin shekarany kesip ótý barysynda tekserý úshin toqtatqan. Áiel de Bishkekte, óz úiinde. Ol sol jaqta turady», - dedi ol.
Aita keteiik, buǵan deiin QR SIM qyrǵyz tarapymen birlesip, oqiǵanyń mán-jaiyn anyqtap jatqanyn habarlaǵan bolatyn.
