قازاقستاننىڭ قىرعىزستانداعى ەلشٸلٸگٸ قىزمەتكەرٸنٸڭ قاتىسۋىمەن بولعان كەلەڭسٸز جايتقا بايلانىستى قىزمەتتٸك تەكسەرٸس جٷرٸپ جاتىر. بۇل تۋرالى بٷگٸن ٶتكەن بريفينگتە قر سىرتقى ٸستەر مينيسترلٸگٸنٸڭ رەسمي ٶكٸلٸ ايبەك سماديياروۆ ايتتى, دەپ حابارلايدى قازاقپارات.
«2020 جىلدىڭ 10 قاڭتارىندا مەملەكەتتٸك شەكارانىڭ «اق جول» - «قورداي» باقىلاۋ-ٶتكٸزۋ پۋنكتٸندەگٸ قىرعىزستان جاعىندا قازاقستاننىڭ قىرعىزستانداعى ەلشٸلٸگٸنٸڭ ەكٸمشٸلٸك-تەحنيكالىق پەرسونالى قىزمەتكەرٸنٸڭ قاتىسۋىمەن وقيعا ورىن الدى. قازٸرگٸ ۋاقىتتا قىزمەتتٸك تەكسەرۋ جٷرٸپ جاتىر. ونىڭ نەتيجەسٸندە تيٸستٸ شارا قابىلداناتىن بولادى«, - دەدٸ ايبەك سماديياروۆ,
ونىڭ ايتۋىنشا, قازاقستان ەلشٸلٸگٸ قىزمەتكەرٸنٸڭ كٶلٸگٸندە وتىرعان ەيەل ەلٸمٸزدٸڭ سىرتقى ديپلوماتييالىق كورپۋسىنىڭ قىزمەتكەرٸ ەمەس. ول ديپلوماتييالىق نٶمٸرٸ بار ەلشٸلٸك قىزمەتكەرٸ باسقارىپ كەلە جاتقان كٶلٸكتە وتىرعان.
«ەلشٸلٸككە ونىڭ ەش قاتىسى جوق. قازٸر ونىڭ ديپلوماتييالىق كٶلٸكتە نەلٸكتەن وتىرعاندىعى انىقتالىپ جاتىر. نەتيجەسٸن قوسىمشا جارييا ەتەمٸز. ول قىرعىزستان اۋماعىنداعى بٸر ٸس بويىنشا كٷدٸكتٸ. وعان سول ەلدەن شىعۋعا شەكتەۋ قويىلعان», - دەدٸ رەسمي ٶكٸل.
ايبەك سماديياروۆ ەلشٸلٸك قىزمەتكەرٸ تۇتقىنعا الىنباعاندىعىن باسا ايتتى.
«ول – بٸشكەكتە. كەيبٸر باق حابارلاعانداي, ول تۇتقىنعا الىنعان جوق. تەك كٶلٸگٸن شەكارانى كەسٸپ ٶتۋ بارىسىندا تەكسەرۋ ٷشٸن توقتاتقان. ەيەل دە بٸشكەكتە, ٶز ٷيٸندە. ول سول جاقتا تۇرادى», - دەدٸ ول.
ايتا كەتەيٸك, بۇعان دەيٸن قر سٸم قىرعىز تاراپىمەن بٸرلەسٸپ, وقيعانىڭ مەن-جايىن انىقتاپ جاتقانىن حابارلاعان بولاتىن.
