Qazaqstannyń Memlekettik kirister komiteti qazaq-qyrǵyz shekarasyndaǵy uzyn-sonar kezektiń sebebin túsindirdi, dep habarlaidy "Ult aqparat".
Memlekettiń ekonomikalyq múddesin qorǵaý jáne taýarlardyń kóleńkeli ainalymyn tómendetý maqsatynda Memlekettik kirister komiteti 2019 jyldyń basynan beri EAEO elderimen shekarada ótkiziletin júkterge monitoring júrgizedi. Sodan bergi ýaqytta jalǵan tulǵalar men bankrottar atyna 10,3 myń taýarlarǵa ilespe qujat resimdelgeni, jalǵan tranzittiń 13 myńnan astam faktisi anyqtaldy.
Tek birinshi toqsannyń ózinde QR arqyly RF-ǵa tranzit retinde málimdelgen júktiń 17% Qazaqstanda qalǵan. Taýarlardyń mundai kóleńkeli ainalymy biýdjetke ziian keltiredi jáne otandyq bizneske básekeniń teń emes jaǵdaiyn týǵyzady. Bul faktilerdiń barlyǵy Qyrǵyz Respýblikasy quzyretti organdarynyń nazaryna jetkizilgen.
2019-2020 jyldar ishinde EAEO jáne DSU alańynda, ekijaqty formatta, quzyretti organdar men úkimet deńgeiinde birqatar kezdesýler boldy.
«Biylǵy aqpan aiynda ótkiziletin júkter boiynsha aldyn ala aqparat almasý, navigatsiialyq qulyptardy jáne eki eldiń aqparattyq júielerinde bar derekterdi paidalaný arqyly taýarlardyń kóleńkeli ainalymyn tómendetý máselelerinde ózara is-qimyldyń qajettiligi talqylandy. Bul órkenietti saýda-sattyqty uiymdastyrýǵa jáne eki memlekettiń biýdjet kiristeriniń artýyna yqpal etýshi edi. Alaida, kezdesý hattamasyna qyrǵyz tarapynan qol qoiylmady, poshta arqyly joldanǵan nusqasy jaýapsyz qaldy. Qyrǵyz áriptester tarapynan syndarly dialogtyń ornyna Qyrǵyz Respýblikasyndaǵy ishki salyqtyq ákimshilendirýdi saýda kedergisi dep taný maqsatynda shekaradaǵy jaǵdaidy ádeii shielenistirý jáne arandatý júrgizilýde» delingen komitet habarlamasynda.
Qazirgi ýaqytta shekarada avtokólik jinalyp qalǵan. Bul jemis-kókónis ónimderi maýsymynyń bastalýymen, QHR-men saýda-sattyqty jańartýmen jáne COVID-19 bailanysty 5 avtomobil ótkizý pýnktiniń jumysyn toqtatýymen bailanysty bolyp otyr.
Iaǵni, ótkiziletin avtokólik qarqyny ótkizý pýnkteriniń ótý jyldamdyǵynan artyq bolyp otyr.
2020 jylǵy 3 maýsymda «Qarasý» AÓP jáne «Aqtilek-avtojol» AÓP-da jinalý sebepterin anyqtaý maqsatynda Qazaqstan Respýblikasy men Qyrǵyz Respýblikasy ókilderi kezdesti. Baqylaý rásimderiniń hronometrajy eki ótkizý pýnktinen ótý - 30-35 minýtty, onyń ishinde QR salyqtyq baqylaý úshin qujattardy skanerleý - 3 minýtty alǵanyn kórsetti.
Bul rette qyrǵyz tarapy hronometraj ótkizý kezinde PTR test tapsyrǵannan keiin júrgizýshiler nátijesin kútpesten, tek saýalnamany toltyryp ǵana QR-na shyǵarylǵanyn rastady. Osyǵan bailanysty ótkizý pýnktinde ony jasaýdyń qajeti qansha degen suraq týyndaidy.
Qazaqstan tarapy shekarada kezek bolmas úshin mundai testileýdi beketten tysqary jerde ótkizýde. Budan basqa, qarsy jolaqpen kezekten tys ótý qyzmetin usynatyn «ótkizip jiberýshilerdiń» áreketine Qyrǵyzstan júrgizýshileri narazylyq bildirýde.
«Búgingi kúni aǵynnyń ulǵaiýyn eskere otyryp, táýligine 200-ge jýyq júk jáne sondai basqada avtokólik quraldary shekaradan ótýde. Shekaranyń Qazaqstan ýchaskesinde taýar-kólik júkqujattaryn skanerleýdi esepke ala otyryp, júk AKQ ótý ýaqyty 15-20 minýtty quraidy. Qalyptasqan mán-jaidy nazarǵa ala otyryp, qyrǵyz tarapyn órkenietti saýda-sattyqty uiymdastyrý jáne biýdjet pen biznes múddesi úshin kóleńkeli ainalymdy qysqartý jóninde birlesken sharalar qabyldaýǵa taǵy da shaqyramyz. Birlesken sharalar qabyldamai bul máseleni sheshý múmkin emes» deidi komitetten.
Keshe EEK otyrysynda Qyrǵyz Respýblikasynyń Vitse-Premeri E.Sh. Asrandievtiń qatysýymen osy máseleler talqylandy, ol birlesken jumys tobyn qurý qajettigimen kelisti.
