Jambyl oblysynda Qordai shekara jasaǵynyń jańa áskeri qalashyǵy ashyldy. Keshen aýmaǵynda 40-qa jýyq qyzmettik ǵimarat pen 300-den astam áskeri qyzmetshige arnalǵan baspana ornalasqan, dep habarlaidy QazAqparat.
Qyrǵyz Respýblikasymen memlekettik shekarany kúzetetin Qordai shekara jasaǵy búgin qonys toiyn toilap jatyr. Saltanatty sharaǵa QR Ulttyq qaýipsizdik komiteti jáne Shekara qyzmetiniń basshylyǵy, sondai-aq attas eldimeken men Jambyl oblysy ákimdiginiń ókilderi qatysty. Shara barysynda Qordai shekara jasaǵynyń basshysyna ózine senip tapsyrylǵan qurylymnyń simvoldyq kilti tabys etildi.
«El Prezidenti - Qazaqstan Respýblikasy Qarýly Kúshteriniń Joǵarǵy Bas Qolbasshysy Nursultan Ábishuly Nazarbaevtyń tapsyrmasyn oryndaý úshin Shekara qyzmetiniń jaýyngerlik qyzmetiniń tiimdiligin arttyrý boiynsha úlken keshendi sharalar ótkizilýde. Jańa bólimshelerdiń turǵyn úi keshenderi salynyp, sońǵy úlgidegi qarý-jaraqtar men tehnikalar satyp alynyp jatyr. Strategiialyq baǵyttardyń birinde shekara kúzetý isimen ainalysyp kele jatqan Qordai shekara jasaǵynyń áskeri qalashyǵyn ashý - sonyń jarqyn dáleli bola alady», - dedi QR Ulttyq qaýipsizdik komitetiniń tóraǵasy Kárim Másimov saltanatty sharada.
QR UQK Shekara qyzmetinen málim etkendei, qurylysy úsh jylǵa sozylǵan Qordai shekara jasaǵynyń jańa áskeri qalashyǵynda 40-qa jýyq qyzmettik ǵimarat bar. Atap aitqanda, ashanalar, kazarmalar, qoimalar, kino kórýge arnalǵan 350 oryndyq úlken akt zaly, shekara otriadynyń Jaýyngerlik Dańq murajaiy, kitaphana, psihologiialyq jeńildeý bólmeleri, sondai-aq túrli jarystar men úiirmeler ótkizýge arnalǵan jeke sporttyq keshen áskerilerdiń igiline berildi. Munda shekarashylardyń áleýmettik jaǵdaiyna, el shebinde adal qyzmet atqarýyna barlyq jaǵdai jasalǵan.
