Jambyl oblysy Qyzylqainar aýyldyq okrýginiń ákimdiginiń ókilderi qazaq-qarǵyz shekarasyndaǵy atys kezinde mert bolǵan er adam týraly aityp berdi, - dep habarlaidy kaz.tengrinews.kz tilshisi.
"Qaza bolǵan azamat bizdiń turǵyn - Erkin Ámirtaev, 1987 jyly týǵan. Memlekettik shekarany buzý deregi. Qai aimaqta bolǵanyn bilmeimin. Artynda áieli men eki balasy qaldy. Qazir tergeý júrip jatyr", - deidi ákimdik ókilderi.
Sonymen birge, qaqtyǵys kezinde QR UQK Shekara qyzmetiniń eki sarbazy jaralanǵan. Jelide olardyń sýretteri paida boldy. Munyń aldynda shabýyldaǵandardyń olarǵa tas laqtyrǵany aitylǵan bolatyn.
Eske salaiyq, shekaradaǵy atys 12 tamyzda saǵat 20:00 shamasynda bolǵan. "Jasórken" shekara zastavasynda shekarashylarǵa Qazaqstan shekarasyn buzǵandarǵa oq atýǵa týra keldi. 15 adamdai jinalǵan top baǵynbaǵan jáne qarsylyq kórsetken. Shabýyl jasaǵandardyń biri jaralanyp, keiin qaitys bolǵan. Qalǵandary oqiǵa ornynan qashyp ketken.
Keiin politseiler bolǵan jaity túsindirip berdi: "Eki áskeri qyzmetker kezekshilikke túsken. Osy kezde 15-20 shaqty adam symdy qiyp, shekarany buzbaq bolǵan. Áskeriler olardy toqtaýǵa shaqyrady, alaida, baǵyný ornyna oar shekarashylarǵa tas laqtyrǵan. Osydan keiin eskertý retinde aspanǵa, keiin shekarany buzýshylarǵa qarai eki oq atylǵan. Oq olardyń birine tigen. Ol Jasórken aýylynyń 1987 jyly týǵan turǵyny bolyp shyqty. Oq basynan tigen. Olar múrdeni ózimen birge alyp ketip, úiine aparyp tastaǵan. Ózderi qashyp ketken", - deidi Jambyl oblysynyń IID-niń ókilderi.
Bul is 2017 jyldyń 13 tamyzynda QR QK-niń 380-babynyń 1-pýnkti boiynsha SDTBT-ǵa tirkeldi.
