Búgin Aqtóbe qalasynda ótip jatqan qazaq kúresinen álem chempionatynda birqatar salmaqtar boiynsha jeńimpazdar anyqtaldy, – dep habarlaidy «Ult aqparat».
Álem chempionatynyń finaldyq oiyndary búgin 55, 60, 90, 100 jáne 100 keliden joǵary salmaqta ótkizildi. Aqtyq synǵa qazaqstandyq úsh balýan shyqty. Olardyń qatarynda Dáýlet Nietbai (55 keli), Nurym Sálimgereev (100 keli) jáne Rýslan Ábdirazaqov (100 keliden joǵary) bar. Úsh sportshymyz da «altynnan» alqa taqty. Dáýlet Nietbai boz kilemde mońǵol elinen kelgen qarsylasynan basym tústi.
Al Nurym Sálimgereev grýziialyq David Loriashvilidiń jaýyrynyn jerge tigizdi. Rýslan Ábdirazaqov ta reseilik Roman Bobikovtiń osal tusyn taba aldy.
Esterińizge sala ketelik, Roman Bobikov jeltoqsan aiynyń basynda ótken «Álem barysy» týrnirinde Aibek Nuǵymarovty jeńip ketken bolatyn. Ózge salmaqtaǵy kezdesýlerge toqtalsaq, 60 kelidegi mońǵoliialyq Battseren Enebish ózbekstandyq Otarbek Hasanovty jeńse, 90 kelide grýzin Paata Gviniashvilli japoniialyq Sanhoe Iýkiden basym tústi.
Aita keteiik, búgingi beldesýlerde Erjan Erenqaiypov (60 keli) pen Ádiljan Ystybaev (90 keli) qola júldeger boldy. Álem chempionatynda endi qazaqstandyq úsh balýan synǵa túsedi. Olardyń qatarynda Qýanysh Ysqaqov (66 keli), Aidos Nalymov (74 keli) boz kilemge shyǵady. Bul salmaqtaǵy beldesýler 16 jeltoqsanda ótkiziledi.
