Foto: Videodan skrinshot
Aqyn Baqyt Bedelhan jýrnalist Qanat Tileýhanǵa bergen suhbatynda qazirgi qoǵamdaǵy otbasy, áiel róli jáne psihologtardyń áseri týraly óz pikirin aitty, dep habarlaidy Ult.kz.
Ol áýeli psihologtardyń tárbielik keńesterin synǵa aldy. Aqynnyń aitýynsha, sońǵy jyldary otbasyndaǵy turaqsyzdyqqa kásibi keńesterdiń yqpaly bar.
“Ár nárse óz ornynda bolýy kerek. 90-jyldardan keiin din taram-taram boldy. Keiingi jyldary psihologtar paida boldy. Sonyń kesirinen keshe ǵana úilengen jastar ajyrasyp jatyr. Qyzyǵy, ol psihologtar erkekterge emes, kóbine áielderge aitady,” – dedi ol.
Baqyt Bedelhannyń paiymdaýynsha, kei keńester áielderdiń otbasyndaǵy ornyn ózgertti.
“Jelide, efirde áielderdi “óz qalaýyńmen ómir súr” dep tárbieleý kóbeidi. Al qazaq otbasyn ustap otyrǵan – áiel. Osy keńesterdi tyńdaǵannan keiin otbasyda túsinispeýshilik artady,” – dedi aqyn.
Sondai-aq ol otbasy salasyndaǵy zańnamany da synǵa alyp, áieldiń quqyǵyn qorǵaýǵa baǵyttalǵan normalar kei jaǵdailarda otbasylyq teńgerimge keri áser etýi múmkin ekenin jetkizdi.
“Áielge daýys kótergen adam jaýapqa tartylady. Bul – qazaq otbasyn álsiretedi,” – dedi Bedelhan.
Suhbat barysynda ol media keńistikte otbasylyq qundylyqtardy jeńil talqylaityn kontent kóbeigenine de alańdaýshylyq bildirdi.
