Qazaqstan Respýblikasynyń Tuńǵysh Prezidenti – Elbasynyń tóraǵalyǵymen Qazaqstan halqy Assambleiasy Keńesiniń otyrysy ótti, dep habarlaidy "Ult aqparat" elbasy.kz saityna silteme jasap.
Kezdesý basynda Nursultan Nazarbaev Qazaqstan halqy Assambleiasynyń qurylý tarihy men qalyptasý protsesine toqtaldy.
– Shirek ǵasyrda Assambleia konsýltativtik-keńesshi organnan parlamentte ókildigi bar jalpyulttyq institýtqa ainaldy. Ol azamattyq qoǵamǵa tán ámbebap qurylymnyń ozyq úlgisin kórsete bildi. Dostyq, beibitshilik, tynyshtyq pen senim qoǵam ómiriniń ajyramas bóligine ainalýyna mańyzdy úles qosty, – dedi Qazaqstan halqy Assambleiasynyń Tóraǵasy.
Elbasy Qazaqstanda tiisti zańdar qabyldanǵanyn, soǵan sáikes etnosaralyq jáne konfessiiaaralyq kelisimge nuqsan keltiretin kez kelgen áreket konstitýtsiiaǵa qaishy keletinin atap ótti.
– Qazaqstannyń bul saladaǵy saiasaty halyqaralyq talaptarǵa tolyq jaýap beredi. BUU, EQYU siiaqty irgeli uiymdar elimizdiń ultaralyq qatynastar modeline jáne ult birligin nyǵaitýǵa baǵyttalǵan kúsh-jigerine únemi joǵary baǵa berip keledi, – dedi Qazaqstannyń Tuńǵysh Prezidenti.
Sondai-aq Nursultan Nazarbaev «Rýhani jańǵyrý» baǵdarlamasyn júzege asyrý barysynda qol jetkizilgen nátijelerge toqtaldy.
Elbasy memlekettik tildiń biriktirýshi róli Qazaqstandaǵy barlyq etnos tarapynan qoldaý tapqanyn atap ótti.
Qazaqstannyń Tuńǵysh Prezidenti koronavirýs indeti epidemiiasy kezinde Assambleia ókilderiniń halyqqa qoldaý kórsetý baǵytynda atqarǵan jumysyn erekshe atap ótti.
Keńes barysynda Qazaqstan halqy Assambleiasynyń Tóraǵasy qoǵam kelisimi men el birligin nyǵaitý jolyndaǵy negizgi mindetterge egjei-tegjeili toqtaldy.
Elbasy Úkimet tarapynan eldiń turaqty ekonomikalyq damýyna, azamattardyń áleýmettik jaǵdaiyn jáne jalpy eldiń ál-aýqatyn arttyrýǵa baǵyttalǵan daǵdarysqa qarsy sharalar qabyldanǵanyn atap ótti.
– Kásipkerlikti qoldaý jáne ekonomikalyq damýdyń elimizde qabyldanǵan memlekettik baǵdarlamalary bizge milliondaǵan qazaqstandyqtardy turaqty tabyspen qamtamasyz etýge múmkindik berdi. Búginde Prezident Qasym-Jomart Toqaevtyń «Jańa jaǵdaidaǵy Qazaqstan: is-qimyl kezeńi» joldaýyn iske asyrý boiynsha jumys júrgizilip jatyr. Bul joldaý - el ómiriniń barlyq salasyndaǵy reformalardyń aýqymdy baǵdarlamasy ispettes, – dedi Nursultan Nazarbaev.
Etnosaralyq qatynastarda jańa, inkliýzivti saiasatqa degen suranys baryn aita kele, Qazaqstan halqy Assambleiasynyń Tóraǵasy qoǵamdy biriktirý úderisterin tereńdetýge baǵyttalǵan is-sharalar ázirleýdiń mańyzdylyǵyna toqtaldy.
– Biz birlik pen kelisimniń qazaqstandyq modeliniń integratsiialyq áleýetin tiimdi ári belsendi túrde júzege asyrýymyz kerek. Qazaqstannyń etnostyq jáne mádeni áralýandyǵyn básekelik artyqshylyqqa jáne eldi damytýdyń, táýelsizdikti nyǵaitýdyń tiimdi tetigine ainaldyrý jumysyn jalǵastyrý qajet. Tatýlyq, kelisim men birlik memlekettik saiasattyń negizgi baǵyty bolyp qala beredi. Bul – etnosaralyq qatynastar salasyndaǵy myzǵymas ustanym jáne ol ózgermeidi, – dedi Elbasy.
Sonymen qatar Qazaqstannyń Tuńǵysh Prezidenti qazaq tiliniń biriktirýshi faktorǵa ainalyp, el birligin odan ári nyǵaitý úshin áleýeti zor ekenin aitty.
Nursultan Nazarbaev eldegi ultaralyq yntymaqtastyqty nyǵaitý úshin qazaq halqynyń artyp kele jatqan tarihi róli men jaýapkershiligine toqtalyp ótti.
– Qazaq halqy memleket qurýshy ult dep nyq senimmen aita alamyz. Halqymyzdyń basym bóligi – qazaq. Sonymen birge ózimizdi, ulttyq namysymyz ben qadir-qasietimizdi jáne tilimizdi qurmettei otyryp, elimizdiń damýyna úlesin qosyp jatqan basqa da otandastarymyzǵa qurmetpen qaraýymyz kerek. Qazaqstannyń jáne onyń barlyq azamattarynyń myqty jáne tartymdy bolashaǵynyń beinesin tek birlese qalyptastyrýǵa bolady, – dedi Qazaqstan halqy Assambleiasynyń Tóraǵasy.
Sondai-aq Elbasy barlyq etnos ókilderin el ómirine belsene atsalysýǵa shaqyrdy.
– Halyqtyń úshten biri – túrli etnos ókilderi. Qazaqstannyń jetistikterine qosqan olardyń úlesi barshaǵa aian jáne biz osy áleýetti odan ári arttyrýǵa tiispiz. Ásirese, bul etnikalyq toptar bir aýmaqta shoǵyrlanǵan jerlerge qatysty. Bir jaǵynan onda osy etnostardyń dástúrin, tili men mádenietin saqtaý jáne damytý úshin tiisti jaǵdai jasalǵan. Al ekinshi jaǵynan osy negizde biz mádeni, lingvistikalyq jáne áleýmettik-ekonomikalyq turǵydan ashyq, oqshaýlanbaǵan qoǵamdastyqtarǵa qoldaý kórsetýimiz kerek, – dedi Nursultan Nazarbaev.
Sonymen qatar, Qazaqstannyń Tuńǵysh Prezidenti Assambleianyń aqparattyq-ideologiialyq jumysynda jastar arasyndaǵy toleranttylyqty kúsheitýge jáne ksenofobiiaǵa qarsy kúreske erekshe mán berý kerektigin atap ótti.
– Assambleia elimizde turatyn barlyq etnos ókilderiniń ortaq tilegi men umtylysynyń arqasynda quryldy. Assambleia – búkil halqymyz birlesip kótergen ortaq bir shańyraq. Bárimiz ony qasterleýimiz kerek. Bizdiń integratsiialyq modelimiz – ári qarai ómir súrip, dami beretin áleýmettik-mádeni, órkenietti tiregimiz, – dedi Qazaqstan halqy Assambleiasynyń Tóraǵasy.
Keńes otyrysy barysynda Qazaqstan halqy Assambleiasy Tóraǵasynyń jańa orynbasarlary tanystyryldy: Almaty oblysy Uiǵyr mádeni ortalyǵynyń tóraǵasy Zakirjan Pirmýhamedovich Kýziev jáne Qazaqstan halqy Assambleiasynyń múshesi, «Kazakh TV» telearnasynyń direktory Bekbaeva Maia Tólegenqyzy.
