"Habar" telearnasyndaǵy "Qyzyq Times" baǵdarlamasy belgili kompozitor Arman Dúisenovti otandyq estradadaǵy kóshirme ándermen tańǵaldyrdy, - dep habarlaidy kaz.tengrinews.kz tilshisi.
Qonaqqa shaqyrylǵan Arman Dúisenovpen baǵdarlama júrgizýshileri Marat Oralǵazin men Erkebulan Myrzabek "Áýendi tap" oiynyn ótkizedi. Oiynnyń sharty boiynsha, qonaq oinatylǵan áýenniń oryndaýshysyn nemese ánniń ataýyn tabýy tiis bolady. Alaida, qazaq estradasynda oryndalyp júrgen belgili ánderdiń avtory nemese oryndaýshysy sheteldikter bolyp shyǵady da, kompozitor elimizde hitke ainalǵan ánderdiń tól týyndy bolmaǵanyna tańǵalysyn jasyrmaidy. Máselen, birinshi áýen oryndalǵanda Arman Dúisenov kompozitsiiadan Tóreǵali Tóreáliniń "Tóreshiń" ánin tanidy tanidy, biraq júrgizýshiler bul ándi rýmynnyń Fly Project (Hello) degen toptyń ánshileri oryndaitynyn aitady.
Keleside sazgerge Álisher Kárimov, Serik Ibragimov pen "Lashyn" toby, "Alaý" toby, Dilnaz Ahmadieva men Maqpal Isabekova, Dastan Orazbekov, Marsel, Tóreǵali Tóreáli, Qairat Nurtastyń oryndap júrgen ánderi usynylyp, ánniń túpnusqa nusqalary oinatylady.
"Bir qaraǵanda kúlkili nárse siiaqty, degenmen qasiret jaǵy da joq emes eken. Men pikir aitar edim, baiaǵyda Feliks Edmýndovich Dzerjinskii degen kisi bireýge aitqan eken: "Bostandyqta júrgenińiz sizdiń jetistigińiz emes, ol bizdiń jumysymyzdyń álsizdigi" depti. Osy tusta bul qazaq kompozitorlarynyń "kóbirek uiyqtaitynynan" týǵan másele shyǵar dep oilaimyn. Bul baǵdarlama stýdiiadaǵy barlyq sazger, oryndaýshy baýyrlarymyzǵa qulaqqaǵys bolatyn shyǵar dep oilaimyn", - dep bólisedi áserin sazger Arman Dúisenov.
Al jeli qoldanýshylary baǵdarlamanyń ázilge qurylǵanyna qaramastan, úlken másele qozǵalyp otyrǵanyn pikir retinde jazǵan. "Marat, Erkebulan, jaraisyńdar. Bul kúletin nárse emes, biraq sizder osy ashy shyndyqty kúlkimen jetkezip, kei ánshi, kei kompozitorlardyń betin ashtyńyzdar" deidi qoldanýshylardyń biri.
