«Aq jol» demokratiialyq partiiasynyń XVI sailaýaldy quryltaiynda partiianyń sailaýaldy baǵdarlama jobasy usynyldy, dep habarlaidy QazAqparat.
«Aq jol» demokratiialyq partiiasynyń tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ideiasy ekenin basa aitty.
«Sońǵy kezdegi birqatar oqiǵa tizbegi byltyr QR Tuńǵysh Prezidentiniń memleket biligin órkenietti túrde jańa basshyǵa tapsyrýy der kezinde bolǵanyn ýaqyttyń ózi dáleldep otyr. Nursultan Nazarbaevtyń prezidenttik júiesi el táýelsizdiginiń bastaýynda, memlekettik institýttardyń qalyptasýynda, túbegeili naryqtyq jáne qoǵamdyq reformalardy júrgizýde jáne basqa eldermen qarym-qatynas ornatýda tarihi missiiasyn oryndady. Kelesi kezeńde Qazaqstan qalyptasqan memleket retinde aiaq basty. Al endigi máselelerdi sheshý úshin jańa tásilder kerek. Memleket basqarý isine qoǵam jan-jaqty aralasyp, ony baqylaýy kerek. Elimizge áleýmettik-ekononmikalyq salada, saiasi júiege de túbegeili ózgerister qajet.
«Atalǵan ózgeristerdi tym soza berýdiń qaýiptiligi sonda, bul Ýkraina, Belarýs pen Qyrǵyz elindei memlekettik daǵdarysqa ákep soǵýy múmkin. Al Táýelsizdiktiń eń basty kepili – qarý emes, óz memleketin syilaityn, baǵalaityn azamattyq qoǵam bolýy kerek. Sondyqtan, qazirgi bilik modeline bir ǵana balama bar. Ol – tereń áleýmettik-ekonomikalyq jáne saiasi reformalardy qabyldap, júzege asyrý qajet. «Aq jol» demokratiialyq partiiasy jańa jáne ádil Qazaqstanǵa aparatyn ózgerister baǵdarlamasyn usynady. Sol baǵdarlamadaǵy basty basymdyǵymyz – Táýelsizdik jáne Alash ulttyq ideiasy.
Elimizdiń Táýelsizdigi men ulttyq múddeler – memlekettiń negizgi basymdyqtary. HH ǵasyrdaǵy «Alash» ulttyq avtonomiiasynyń kóshbasshysy Álihan Bókeihan «Memlekettigi joq halyq – jetim» dedi. Al QR Tuńǵysh Prezidenti Nursultan Nazarbaev «Táýelsizdik úshin qurbandyqqa aianatyn eshteńe joq» dedi. Qazaqstan Respýblikasynyń Táýelsizdigin qamtamasyz etý jáne onyń ulttyq múddelerin qorǵaý – ózin respýblika azamaty sanaityn kez kelgen adamnyń paryzy. Táýelsizdik – bizdiń elimiz, jerimiz, tilimiz ben dilimiz. Táýelsizdik – bizdiń óz jolymyzdy tańdaý múmkindigimiz, keleshek urpaqtyń bolashaǵy úshin bizdiń jaýapkershiligimiz», - deidi A. Perýashev.
Táýelsizdik pen elimizdiń tutastyǵy – árbir adamnyń ómiri, quqyǵy jáne bostandyǵymen qatar turatyn basty qundylyq.
«Táýelsizdik bastaýynda qazaq halqynyń erkindigi men eldiginiń tarihi muraty retindegi Alash ulttyq ideiasy jatyr. Qazaq eline Alashtan artyq ideia joq. «Aqjol» demokratiialyq partiiasy memlekettik tildiń qoldaný aiasyn keńeitýdi qoldaidy. Qazaq tili ekonomika men qarjy salasynda, memlekettik basqarý men sheteldik investorlar jumysyna memlekettik deńgeige sai engizýimiz kerek», - dedi Azat Perýashev.
