Lanjoý qalasynda ótken 2019 jylǵy erkin kúres túrinen Qytai chempionatynda qazaq balýany Erlanbek Káteiuly taǵy da altyn medalǵa ie boldy. Bul týraly Qytaidyń CNR aqparattyq portaly habarlady.
Qytaidaǵy balýandardyń kil myqtysyn anyqtaityn bul jolǵy respýblikalyq bairaqty básekege 137 komandadan 1120 sportshy qatysqan. 9 kún boiy 10 túrli salmaq boiynsha baq synaǵan chempionatta qandasymyz, Gansý ólkesiniń balýany Erlanbek Káteiuly 65 keli salmaǵynda bas júldeni enshilegen.
Erlanbek Káteiuly 2009 jyldan beri Qytai chempionattarynda jeńis tuǵyrynan túspei kele jatqan balýan. Ol Qytaidyń Altai aimaǵyna qarasty Qyzyltas qalashyǵynda dúniege kelgen. Ol 2010 jyly Qytai birinshiliginde 65 keli salmaq dárejesi boiynsha chempion atanǵan. 2014 jyly Ońtústik Koreianyń Inchhon qalasynda ótken Aziia oiyndarynda qola medal ielengen.
Aita ketsek, Erlanbek Qytaidaǵy qazaqtar arasynan Olimpiadaǵa joldama alǵan úshinshi qandasymyz. Oǵan deiin grek-rim kúresinen Álnur Tórgeuly, bokstan Qanat Islam Olimpiadada Qytai atynan óner kórsetken bolatyn.
