Madrid qalasynda qazaq ádebietiniń ispan tilindegi antologiiasyn aýdarý, basyp shyǵarý men taratý jumystaryna qatysty kelissózder aiaqtaldy.
«Rýhani jańǵyrý» baǵdarlamasyn júzege asyrý maqsatynda qolǵa alynǵan joba aiasynda Ispaniia mádeniet Ministrligimen strategiialyq seriktestik ornatylyp, «Servantes Institýty» joba keńesshisi retinde bekitildi.
Birqatar ispaniialyq iri basylymdardyń usynysy saralana kele, qazirgi zamanǵy qazaq ádebietiniń ispan tilindegi eki antologiiasyn aýdarý, basyp shyǵarý, taratý jumystary úshin «Visor-Libros» baspa úii tańdaldy.
Atalǵan memorandým ispan astanasyndaǵy Qazaqstan elshiliginde jasaldy. Qujatqa «Rýhani jańǵyrý» baǵdarlamasyn iske asyrý jónindegi Ulttyq komissiianyń hatshysy Aida Balaeva men baspa úiiniń Prezidenti Hesýs Garsia Sanches qol qoidy. Is-sharaǵa Qazaqstannyń Ispaniiadaǵy elshisi Konstantin Jigalov pen «Ulttyq aýdarma biýrosynyń» direktory Raýan Kenjehanuly qatysty.
«Visor-Libros» baspasy – shetel ádebietimen ainalysatyn mamandandyrylǵan biregei baspa. Baspa úii kóp jyldyq tájiribege ie. Álemniń ondaǵan elimen jumys jasap, aqyn-jazýshylar shyǵarmashylyǵyn nasihattaýda ónimdi eńbek etip keledi.
«Visor-Libros» baspasy Ispaniiada ǵana suranysqa ie bolyp qoimai, Latyn Amerika elderi men Soltústik Amerikadaǵy ispan tildi memleketterde de keńinen tanymal.
Qazaqstan men eki el arasyndaǵy kelisimge sáikes, qazaq ádebieti antologiiasyn tek Ispaniiada ǵana emes, ózge elderde de taratý-nasihattaý jumystary kózdelgen. Kópshilik biletindei, ispan tili tek ispan eliniń ǵana emes, sonymen qatar Latyn Amerikasynyń 18 eli úshin de ana tili sanalady. Bul tilde álemde 600 millionnan astam adam sóileidi.
«Biz úshin eń bastysy – ispan oqyrmandarynyń talǵamynan shyǵyp, júrekterine jol tabatyn sapaly da saýatty aýdarma usyný. Bizdiń shyǵarmashylyq toptar, iaǵni qalamgerler arasyndaǵy birikken is eki eldiń mádenietin tabystyratyn hám ara-qatynasyn odan ári jaqyndastyratyn altyn kópir bolmaq», - dedi Aida Balaeva ispan baspagerlerimen bolǵan kezdesýde.
Óz kezeginde, «Visor-Libros» baspa úiiniń Prezidenti ýaqytyly qolǵan alynǵan mańyzdy bastamanyń sebepkeri bolǵanyna qýanyshty ekenin jetkizdi. Hesýs Garsia Sanches bul seriktestiktiń saiasi ia bolmasa kommertsiialyq turǵydan emes, mádenietter birligi turǵysynan mańyzdy bastama ekenin basa aitty.
BUU-nyń 6 tiline aýdarylǵan zamanaýi otandyq ádebiet ókilderiniń shyǵarmalar jinaǵy «Jahandaǵy zamanaýi qazaqstandyq mádeniet» jobasy boiynsha jasaqtalǵan. Tiisinshe, bul joba - Memleket basshysy Nursultan Ábishuly usynǵan «Rýhani jańǵyrý» baǵdarlamasynyń quramdas bóligi.
«Jahandaǵy zamanaýi qazaqstandyq mádeniet» jobasynyń mindeti – álem jurtshylyǵyna táýelsizdik kezeńindegi ádebietimizdiń, mýzykamyzdyń, sýret jáne bi óneriniń, sonymen qatar kino men teatr óneriniń jetistikterin pash etý.
Joba aiasynda qazirgi qazaq ádebietiniń qos antologiiasy ispan tiline aýdarylatyn bolady. Olar: «Qazirgi qazaq poeziiasynyń antologiiasy» men «Qazirgi qazaq prozasynyń antologiiasy». Árbiri shamamen 500 betten turatyn antologiialarǵa 60 qazaqstandyq avtordyń shyǵarmasy engizilgen. Olardyń qurylymy men mazmuny Qazaqstan Jazýshylar odaǵynyń arnaiy keńesinde bekitilgen.
Eske sala keteiik, keshe ǵana Ulybritaniiada «Rýhani jańǵyrý» baǵdarlamasyn iske asyrý jónindegi Ulttyq komissiia men Kembridj ýniversiteti baspahanasy arasynda yntymaqtastyq jóninde memorýndamǵa qol qoiylǵan bolatyn. Kelisim boiynsha ulybritaniialyq baspahana qazirgi zamanǵy qazaq ádebietiniń aǵylshyn tilindegi antologiiasyn aýdarý, basyp shyǵarý men taratý jumysyn qolǵa alatyn boldy.
