Foto: egemen.kz
Janjaldarǵa ulasatyn zertteýlerimen belgili bloger Erkejan Shaihieva óziniń instagram paraqshasynda "Asar-Ýme" mádeni-bilim berý qorynyń 2023 jylǵa arnalǵan Aýditorlyq esebinen" úzindini jariialady. Onda qaiyrymdylyq qory qyzmetkerleriniń shtattyq keste boiynsha ai saiynǵy eńbekaqysy jazyldy. Osy tól "Aýditorlyq esebin" "Asar-Ýme" qorynyń ózi ashyq jariia etkenin aita ketken jón, dep habarlaidy «Ult aqparat» inbusiness.kz-ke silteme jasap.
Odan qordyń vitse-prezidenti – 1 120 703 teńge, bas direktory – 997 247 teńge, mediaǵa jaýapy atqarýshy direktory, áleýmettik bólimge jaýapty atqarýshy direktory jáne "Órkendeý" atqarýshy direktory – 873 790 teńgeden ailyq alatyny anyqtaldy.
Basqalary da astatók igilikten qaǵylmapty. Óńirlik menedjeriniń, áleýmettik jumys boiynsha bas menedjeriniń, syrtqy bailanystar men kommýnikatsiialar jónindegi menedjeriniń, logistika boiynsha menedjeriniń árqaisysynyń ailyq jalaqysy – 750 333 teńgeden eken. Qorda 2023 jylǵy 31 jeltoqsandaǵy jaǵdai boiynsha bas menedjerge qosa, áleýmettik jumys jónindegi 2 menedjer jaldanǵan. Olardyń árqaisysyna 625 215 teńgeden ailyq tólengen. Al, assistenttiń jalaqysy menedjerden de kóp (688 346 teńge).
Bul rette, blogerdiń dereginshe, qor basshylyǵynyń ǵana emes, qyzmetkerleriniń ailyǵy jyl saiyn eki esege jýyq ósip otyr.
Mysaly, vitse-prezidenttiń ailyǵy 2022 jylǵy 687 052 teńgeden byltyr 1 120 703 teńgege deiin, menedjerlerdiń jalaqysy bir jyl ishinde 499 637 teńgeden 750 333 teńge deiin, áleýmettik jumys jónindegi eki menedjerdiń ailyǵy 373 373 teńgeden 625 215 teńgege deiin, assistentiniń eńbekaqysy 310 242 teńgeden 688 346 teńgege deiin kóterilgen. 2022 jyly bolmaǵan, aqysy tólenetin bas direktor laýazymy engizilipti.
Qordaǵy qatardaǵy qyzmetkerleriniń alatyn ailyǵy memlekettik qyzmettegi tipti komitet-departament basshylary úshin arman bolsa kerek. Býhgalterdiń ailyǵy 2022 jylǵy 252 526 teńgeden 2023 jyly 505 050 teńgege deiin, 4 videooperatorlardyń jalaqysy 436 505 teńgeden 688 346 teńgege deiin ósken eken. SMM-menedjeriniń ózine 688 346 teńge ailyq beriletini kórsetilgen.
Budan bólek, "Aýditorlyq esepte" "Asar-Ýme" qorynyń qaiyrymdylyq jinaýǵa arnalǵan bir keshke 7,2 million teńge, issaparlar kezinde qonaqúilerge – 11,1 million, issaparlar kezinde jol shyǵynyna – 10,7 million, jarnamaǵa – 1 mln, jalaqyǵa – 164,9 million teńge jumsaǵany aitylǵan.
Bul derekter áleýjeli paidalanýshylar arasynda rezonans týdyrdy.
"Qaiyrymdylyq degen tamasha nárse. Biraq onyń qadiri túsip bara jatqandai. Men mysaly, kardiohirýrg bolyp isteimin. Jalaqym 250 myń teńgedei ǵana. Bul jumystyń jaýapkershiligi million protsent! Al, mynda qordyń qatardaǵy SMM-menedjeri sadaqa esebinen meniń úsh ailyq jalaqyma jýyq qarajatty bir aida alady eken. Kúlki me, kúná ma? Mundaidy bilip, jiger qum bolady", – dep taýsyla pikir jazdy paidalanýshylardyń biri.
"Asar-Ýme" qaiyrymdylyq qory ózine qarsy baǵyttalǵan "heitke" jaýap berdi.
"Adaldyq, ádildik, kásibilik – biz óz jumysymyzda osy qundylyqtardy basshylyqqa alamyz. Elimizde qarapaiym jumysshy da, stýdent te, biznesmen de, saiasatkerler men tanymal adamdar da qaiyrymdylyq jasaýda jarysqa túsetinine qýanyshtymyz. Biz – olardyń arasyndaǵy kópirmiz. Osy jyldary izgilik is jasap kele jatqan árbir adamǵa rizashylyǵymyzdy bildiremiz. Keiingi kúnderi "Asar-Ýme" qoryna qarsy belgili bir heit, qysym júrip jatyr. Ol adamdardyń bizge shabýyldap, qara kúie jaǵý nieti joqtyǵyn bilemiz. Degenmen, oǵan jaýap berýge uiǵardyq", – dedi qor ókilderi.
Jobanyń negizin qalaýshy Ashat Nurmashev áleýmettik jelidegi syndy qormen jumys isteitin belgili tulǵalardyń qarsylastary órbitýi múmkin dep tuspaldady.
"Asar-Ýme" alaiaq eken, esep bermeitin kórinedi dep aityp jatyr. Biraq osy bes jyl ishinde biz esep berýge ábden tóselip aldyq. Aýditorlyq tekseristen keiin esebimizdi videokontent túrinde de, keste túrinde de beremiz. Ol esepterge ashyq qol jetkizýdi qamtamasyz ettik. Keibireýdiń aitýynsha, biz 30-40 million teńgeden jinaimyz, nátijesinde, muqtaj janǵa 10-15 million teńge ǵana turatyn arzan úidi satyp áperemiz, qalǵan aqshany ózimizge qaldyrady ekenbiz. Biz halyqpen birge, halyqtyń arasynda qanshama is tyndyrdyq. Jumys bastan asady. Biz halyqtan 100 teńgesin de urlaǵan joqpyz", – dedi Nurmashev.
Aita ketý kerek, "Asar-Ýme" qorynyń 2023 jylǵa arnalǵan, biylǵy 31 qazanda jariialanǵan.
"Aýditorlyq esebinde": "Qor muqtaj otbasylarǵa arnalǵan baǵdarlamasy aiasynda satyp alynatyn baspananyń somasyna qatysty kelesidei negizgi sharttardy belgiledi: Astana, Almaty jáne Shymkent qalalarynda, sondai-aq osy qalalardyń 20 shaqyrym janynda – 12 mln teńgege deiin, Qazaqstannyń basqa eldi mekenderinde – 10 mln teńgege deiin", – dep naqty jazylǵan.
Esep boiynsha 2023 jyly qorǵa qaiyrymdylyq qarajattary túrinde 3 milliard 972 million 609 myń teńge túsipti. Odan muqtaj jandarǵa satyp alynǵan baspanalardyń qojaiyndaryna 3 mlrd 34,2 million teńge tólengen kórinedi. 51,7 million teńgege otbasylarǵa turmystyq tehnika satyp alynǵan.
Shet memleketterge gýmanitarlyq kómek retinde "Asar-Ýme" 246 million 831 myń teńge aýdarǵan.
Qor lideriniń sendirýinshe, qordyń basty qaǵidasy bar. Mysaly, 30 ne 50 million teńge jinasa, ol qarajatty túrli qalalar men aýyldardaǵy zárý jandar arasynda bóledi. Keibir jerde úidi 10, basqasynda 12 million teńgeden satyp alady. Odan qymbat úidi alýy "sirek kezdesedi".
Mysaly, erekshe qajettiligi, múgedektigi bar balaly otbasylarǵa kómekteskende baspanany qala shetinen emes, aýrýhanasyna jaqyn aýdannan izdeýge týra keletin kórinedi.
"Asar-Ýme" qory óz jumysyn 2019 jyly bastady. Sodan beri, ózderiniń dereginshe, 1 019 otbasyǵa jáne 5 544 balaǵa kómektesipti.
Jalpy, áleýmettik jelini paidalanýshylardyń kópshiligi qordy aqsha urlady dep aiyptap otyrǵan joq. Qazaqstandyqtardy olardyń qarapaiym qyzmetkerine deiin komitet basshysy deńgeiinde jalaqy tóleitini airan-asyr etti.
"Qordyń esepterin qarap shyqtym. Shyǵystaryna "shok" bolyp otyrmyn. Eshqandai óndirisi joq, eńbekaqy tóleý qoryna 170 milliondai, issaparlarǵa 11 million, qaiyrymdylyq keshine 7 million teńge shyǵyndaǵan. Onyń bárin elden jiǵan qaiyrymdylyq qarajattan, sadaqadan alǵan. Ózderin eshteńeden shektemegendei. Qanaǵat degen qaida?", – deidi kásipker Zarina Tilepova.
Ózin "biznes-ustaz" dep tanystyryp júrgen Erjan Nurǵaliev "kórealmaýshylyqty qoiý kerek" degen pikirde.
"Men bilemin, bul qordaǵy biraz jigittiń tól baspanasy joq. Ailap jumys isteidi, óz otbasylaryn kórmeidi. Taryqqan halyqqa kómektesý úshin kólikpen aýyl-qalalardy aralaidy, mashinada túneidi! Bizdiń keibirimiz shydamai, short synýymyz múmkin túrli taýqymetke tap bolady. Aqylǵa keleiik, blogerdiń nemese biznesmenniń jeke ómirin qazbalamaiyq. Syrttai bárimiz sútten aq, sýdan tazamyz ǵoi. Olar barynsha kóp adamnyń basyna pana taýyp berý úshin meilinshe kóp qaiyrymdylyq qarajat jinaý úshin baryn salyp júr", – dedi Erjan.
Keiingi kezde qaiyrymdylyq qarajatyn jinaýǵa jáne jumsaýǵa qatysty daý-janjal kóbeiip bara jatqandyqtan, Mádeniet jáne aqparat ministrligi depýtattarmen birlesip, osy salany jańasha, muqiiat retteitin jańa zań jobasyn ázirleýge kiristi. Vedomstvonyń tujyrymdaýynsha, tek sonda ǵana qaiyrymdylyq qyzmeti tiimdi baqylanady jáne jurtshylyqtyń izgilik isteý salasyna senim deńgeiin arttyrýǵa bolady.
Vedomstvoǵa tiisti tapsyrmany Premer-ministrdiń ózi júktegen eken.
"Tapsyrmany oryndaý úshin ministrlik qaiyrymdylyq qarjynyń maqsatty paidalanylýyn qamtamasyz etý jáne qaiyrymdylyqtyń ashyqtyq deńgeiin arttyrý bóliginde qoldanystaǵy zańnamaǵa ózgerister engizý jumystaryn júrgizýde. Ministrdiń 2024 jylǵy 6 mamyrdaǵy buiryǵymen, ministrlikte memorgandardyń, qaiyrymdylyq uiymdarynyń, kvazimemlekettik jáne kásipkerlik sektorlardyń ókilderinen turatyn, zańnamaǵa ózgerister men tolyqtyrýlar engizý jónindegi jumys toby quryldy. Túzetýlerdi qoǵamdyq talqylaýdy ótkizý josparlanýda", – dep málim etti Mádeniet jáne aqparat ministrligi.
Jańa zań qabyldansa, onda halyqaralyq tájiribege sáikes, eldegi barlyq qaiyrymdylyq uiymdary ministrliktiń akkreditteýinen ótýge tiis bolady. Olardyń biryńǵai tizilimi júrgiziledi. Biryńǵai onlain platformada bári esep beredi. Qaiyrymdylyq komissiiasy qurylady.
Basqa da ózgerister pysyqtalýda. Bul jumys Qarjy monitoringi agenttigimen birlesip júrgizilýde. Qaiyrymdylyq uiymdary qaiyrymdylyq qarajatty tek qana arnaiy shottarǵa jinaýǵa mindettelmek. Sonda onyń qaida, ne maqsatqa shyǵyndalyp jatqanyn tekserý jeńildeidi. Mysaly, aqparat quraldary "Asar-Ýme" jáne basqa qorlar shetelge, aitalyq, Gaza sektoryndaǵy zardap shekkenderge qarajat jinaǵanyn habarlady. Ol qarjy shynymen de Izraildiń agressiiasynan qinalǵan jandarǵa jete me? Ol baqylanǵany jón.
Budan bólek, jańa zańda qaiyrymdylyq uiymdary men jeke tulǵalardyń qaiyrymdylyq salasyndaǵy zańnamany buzǵany jáne jinalǵan qarajatty maqsatsyz, basqa jerge paidalanǵany úshin jazasyn kúsheitetin normalardy engizý usynylady.
Daiyndalǵan zańnamalyq túzetýlerdi "QR keibir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl máseleleri boiynsha ózgerister men tolyqtyrýlar engizý týraly" zańynyń jobasy sheńberinde qaraý josparlanǵan. Qalai bolǵanda, jetimin jylatpaǵan, jesirin qańǵyrtpaǵan halyqtyń materialdyq, rýhani turǵydan meiirimdilikke muqtaj jandardan teris ainalmaǵany mańyzdy.
