«Mektepke jol» jobasy aiasynda sońǵy bes jylda oqýshylar 36 mln teńgeniń oqý qural-jabdyǵymen qamtamasyz etildi.
Bul týraly Ortalyq kommýnikatsiialar qyzmetinde ótken onlain brifingte «ShUǴYLA» qoǵamdyq qorynyń quryltaishysy Meirhan Abdrahmanov aitty, dep habarlaidy QazAqparat.
«Biz belgili bir áleýmettik toptaǵy adamdarǵa kómektesemiz, olar: kópbalaly otbasylar, tolyq emes otbasylar jáne múgedek bala tárbielep otyrǵan otbasylar. Olarǵa áleýmettik jaǵynan, meditsinalyq turǵyda kómek kórsetemiz. Sondai-aq, qaiyrymdylyqqa qatysty birneshe jobamyz bar. Sonyń biri – «Bereke» jobasy. Bul joba aiasynda biz azyq-túlik satyp alyp, qoraptarǵa salyp, ákimdikten muqtaj otbasylardyń tizimin alyp, taratamyz. Azyq-túlik taratýshylar ómirde qandai jaǵdai bolýy múmkin ekenin kózben kóredi. Qaiyrymdylyq jasaý barysynda adam rýhani lázzat alady», - deidi «ShUǴYLA» qoǵamdyq qorynyń quryltaishysy Meirhan Abdrahmanov.
Onyń aitýynsha, ol qolǵa alǵan ekinshi joba «Jylý syila» dep atalady.
«Bul joba arasynda kómirge muqtaj otbasylarǵa kómir taratamyz. 5 jyl ishinde Almaty oblysynda 3 mln 600 myń tonna kómir tarattyq. Úshinshi jobamyz otbasynyń otbasyǵa kómektesýine negizdelgen. Jaǵdaiy jaqsy otbasylarda kóp kiim artylyp qalady. Sol kiim-keshekti qordyń dúkenine ótkizedi. Al muqtaj adamdar sol dúkenge kelip, kiim ala alady. 3-4 jyl ishinde 96 tonnadai kiim-keshek tarattyq. Sondai-aq, «Mektepke jol» dep atalatyn jobamyz bar. Sońǵy bes jylda oqýshylardy 36 mln teńgeniń oqý qural-jabdyǵymen qamtamasyz ettik. Sonymen qatar, áleýmettik jaǵdaiy tómen otbasylarǵa fliýrografiiadan tegin ótýge, MRT-ǵa tegin túsýge kómektesemiz. Sal aýrýyna shaldyqqan balalarǵa tegin massaj jasatý jáne basqa da protsedýralaryna kómektesemiz. Áleýmettik salaǵa qatysty «Bilim joly» degen jobamyz bar. Bul joba aiasynda áleýmettik jaǵdaiy tómen otbasylardyń balalaryn UBT-ǵa daiyndaimyz jáne aǵylshyn tilin úiretemiz. Biyl pandemiia kezinde halyqpen birge 450 mln teńge jinap, shilde-tamyz ailary aralyǵynda elimizdegi 380 meditsinalyq uiymǵa 4000 ottegi kontsentratoryn tarattyq», - deidi ol.
