Qaiyrymdylyq uiymdaryna memlekettik múlikti jeńildik arqyly paidalaný múmkindigi beriledi. Bul týraly QR Aqparat jáne qoǵamdyq damý vitse-ministri Bolat Tilepov aitty, dep habarlaidy QazAqparat.
«Azamattardyń bastamalary men jalpy belsendiligin kótermeleý úshin zańǵa qaishy kelmeitin ártúrli mehanizmder qarastyrylǵan. Atap aitar bolsaq, volonterlik pen qaiyrymdylyq jasaý siiaqty qyzmet túrleri qazirgi pandemiia, keshegi tótenshe jaǵdailar kezinde erekshe ózekti bolýda. Osy nebári bir jylda elimizdegi volonterlik uiymdardyń sany 3 ese ósip, eriktilerdiń qatary 200 myńǵa jetti. Sondyqtan, Prezidenttiń bastamasymen olarǵa júieli qoldaý mehanizmderi engizilip jatyr. Bul eń aldymen qoldanystaǵy zańdy jetildirýge qatysty», - dedi Bolat Tilepov Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, birinshiden, joǵary, arnaýly orta oqý oryndaryna túsý kezinde, sondai-aq azamattyq jáne memlekettik qyzmetke kirý kezinde volonterlerdiń, qaiyrymdylyq jasaýshylardyń quqyqtaryn keńeitý qarastyrylady. Ekinshiden, volonterlik jáne qaiyrymdylyq uiymdaryna memlekettik múlikti jeńildik arqyly paidalaný múmkindigi engiziledi.
Úshinshiden, zeinetkerlikke shyqqan kezde azamattardyń volonterlik qyzmet atqarǵan ýaqytyn esepke alý kózdeledi. Tórtinshiden, korporativtik volonterlik, qaiyrymdylyq jáne elektrondyq qaiyrymdylyqpen ainalysý boiynsha normalar engiziledi. Iaǵni, fandraizing, kraýdfanding platformasy, tólem terminaldary, SMS, onlain banking arqyly qaiyrymdylyq jasaý tetikteri pysyqtalady. Besinshiden, qaiyrymdylyq kómektiń ashyqtyǵyn qamtamasyz etý úshin qaiyrymdylyq uiymdardyń reestri jasalady. Sonymen qatar, qaiyrymdylyq uiymdaryn iske asyrǵan jumystary týraly esep berýge mindetteitin norma engiziledi.
«Budan bólek, ministrlik Volonterlikti damytýdyń 2021-2023 jyldarǵa arnalǵan jol kartasyn ázirlegen bolatyn. Ol volonterlik bastamalardy odan ári damytýǵa yqpal etip, azamattardyń volonterlik qyzmetke qatysýyn jandandyrýǵa, volonterlik mádenietti odan ári nyǵaitý úshin jaǵdai jasaýǵa múmkindik beredi», - dedi vitse-ministr.
