Elde tótenshe jaǵdai bastalǵaly qaiyrymdylyqtyń kerýeni óz jumysyn bir sátke de toqtatqan emes. Qaiyrymdylyq jasaýdy azamattyq paryzy sanaityn jandarǵa kópshilik dán riza.
«QAMQOR QAZAQSTAN» áleýmettik jobasy aiasynda «Almaty oblysynyń kásipodaqtar ortalyǵy» aýmaqtyq kásipodaqtar birlestiginiń «Keleshek» jastar keńesiniń eriktileri kópbalaly, jalǵyzbasty jáne áleýmettik az qamtylǵan otbasylardy azyq-túlikpen qamtamasyz etti.
«Keleshek» jastar keńesiniń tóraǵasy Baqtiiar Jaqsykeldinov bastaǵan bir top qaiyrymdy jan Taldyqorǵan qalasyna qarasty Erkin aýylynyń turǵyny, ekinshi toptaǵy múgedek Raia Mámbetovanyń shańyraǵyna baryp, qajetti azyq-túlik ónimderin tapsyrdy. II toptaǵy múgedek qyzyn qarap otyrǵan ardaqty ana eldegi qiyn jaǵdaiǵa qaramai memleket ár qazaqstandyqqa barynsha jaǵdai jasap jatqanyna alǵys aityp, aq batasyn berdi.
Múmkindigi shekteýli 80 jastaǵy joldasy men 52 jastaǵy ulyna bas-kóz bolyp otyrǵan taldyqorǵandyq Rábilá Nurbekovanyń otbasy Semei qalasynan qonys aýdarǵan. Talai beinetti kórse de úmit úzbegen aiaýly ana oblys, qala basshylyǵyna, qaiyrymdy azamattarǵa rizashylyǵyn bildirdi. «Bizdi arnaiy izdep, kómek kórsetkenderińe rahmet. Bizdiń jasymyzdy senderge bersin. Biz kórgen beinetti jastar kórmesin dep tileimin. Jaǵdaiymyzdy eskergen ákimdik tegin gaz qubyryn jalǵap berdi. Memleketime, ákimderge tek qana rahmet aitamyn. Elimiz aman, jurtymyz tynysh bolsyn», – deidi Rábilá Nurbekova.
– El basyna qiyn kún týǵan shaqta bir-birimizge barynsha demeý bolǵanymyz jón. Sondyqtan da QR Kásipodaqtar federatsiiasy janyndaǵy «Qazaqstan eńbek adamy» korporativtik qorynyń uiymdastyrýymen «Transtelekom» AQ demeýshiligimen jáne «Keleshek» jastar keńesiniń qoldaýymen «QAMQOR QAZAQSTAN» áleýmettik jobasy qaiyrymdylyq jumysyn bastady. «Jaqsylyq jasaýǵa asyǵaiyq!» atty aktsiia aiasynda aldaǵy ýaqytta 30 otbasyǵa kómek kórsetiledi. Bul kómek túrin alatyn turǵyndardyń tizimi aldyn ala daiyndaldy. Kómekke muqtaj otbasylar, jalǵyzbasty analar, kópbalaly áýlet bizdiń basty nazarymyzda. Olarǵa qoldan kelgenshe kómek kórsetýge daiynbyz, – deidi «Keleshek» jastar keńesiniń tóraǵasy Baqtiiar Jaqsykeldinov.
Eńlik KENEBAI
Almaty oblysy
"Jetisý" gazeti
