Foto Facebook/Dias Nýrakyn
Qaiyńdy kóline bara jatqan jolda bolǵan apat saldarynan tórt sheteldik týrist zardap shekti. Bul aqparatty Almaty oblysy Kegen aýdanynyń ákimi Nurbaqyt Teńizbaev rastady, dep habarlaidy Tengrinews.kz saity.
"Osy apattan tórt sheteldik týrist zardap shekti - eki reseilik jáne Úndistannan kelgen eki týrist. Olar jeńil jaraqattanǵan. Jol-kólik oqiǵasynan keiin birden jedel járdem kóligimen Jalańash aýylyndaǵy aýrýhanaǵa jetkizilip, tekserilip, kómek kórsetildi", - dedi Teńizbaev.
Oqiǵa ornynda 1986 jyly týǵan áiel qaza tapqany belgili boldy.
"Eki avtobýs soqtyǵysqan. Bir avtobýsta 10 adam, ekinshisinde 23 adam boldy. Shaǵyn avtobýsta bolǵandardyń kóbi zardap shekken", - dep túsindirdi Kegen aýdanynyń ákimi.
Sondai-aq, ol Kólsai men Qaiyńdy kólderine jyl saiyn 200 myńǵa jýyq týrist keletinine qaramastan, Qaiyńdyǵa baratyn joldyń sapasy óte tómen ekenin moiyndady. Ol Kólsai men Qaiyńdydaǵy infraqurylymdy qalpyna keltirýge ýáde berdi.
Almaty oblysy ákimdiginiń málimetinshe, 5 qazanda Kegen aýdany, Saty aýyldyq okrýginde Qaiyńdy-Saty taýly jolynyń 9-shaqyrymynda 47 jastaǵy avtobýs júrgizýshisi qarsy qozǵalysqa shyǵyp ketip, jol apatyna sebep bolǵan. Ol ÝAZ kóligimen betpe-bet soqtyǵysqan.
Qazirgi ýaqytta Kegen aýdandyq aýrýhanasyna 1 naýqas, Shelek aýylynyń aýdandyq aýrýhanasyna 2 naýqas, Almaty kópsalaly klinikalyq aýrýhanasyna 9 naýqas jatqyzyldy. Naýqastardyń jaǵdaiy ortasha aýyr.
"Bul derek Qazaqstan Respýblikasy Qylmystyq kodeksiniń 345-baby 3-bóliginde kózdelgen qylmystyq quqyq buzýshylyq deregi boiynsha Kegen aýdandyq politsiia bólimine tirkelip, qazirgi ýaqytta saraptama taǵaiyndalyp, qajetti tergeý áreketteri júrgizilip jatyr. Avtobýs júrgizýshisi Kegen aýdanyndaǵy PB ýaqytsha ustaý izoliatoryna qamaldy. Bul másele Almaty oblysy ákiminiń baqylaýynda", - dep tolyqtyrdy ákimdik.
