QAIYM MUHAMEDHANOVTYŃ TÝǴANYNA 100 JYL
Qaiym murasyn jinaqtaýshy, "Qaiym Muhamedhanov atyndaǵy bilim jáne mádeniet qorynyń" direktory Dina Qaiymqyzynyń arhivinen ǵalymnyń 1986 jyly Jeltoqsan kóterilisine arnap jazylǵan óleńi tabyldy.
Óleń arab grafikasymen jazylǵan. Búgingi grafikaǵa túsirgen tarih ǵylymdarynyń kandidaty Amantai Isin.
JAMALITTENOVKE! (KOM - N)
Halqyn satyp, qanǵa bókken qandy aýyz,
Jemtik jalmap, jalańdaǵan jalmaýyz.
Qý qulqynǵa qul bolǵan sum, surqiia,
Sen - aram niet, sen – qarabet, sen – jaýyz!
Itten týyp, innen shyqqan sekildi,
Kóz kórmesin arsyz qara betińdi.
Kúńirenip, kókke saýyp aq sútin,
Seni tapqan qairan ana ókindi!
Máńgúrt-dońyz otyrdy-aý dep tórimde,
Ǵulamitdin dóńbekshidi kórinde.
Ata-anańnyń qarǵys atqan júzqara
Qarańdy óshir, jat ókirip kórińde!
Qyzyl qyrshyn qazaqtyń qyz-uldaryn,
Adal júrek, ar-namystyń quldaryn
(Máńgi baqi el esinen keter me)
Sógip, soǵyp, qanyn tógip qyrǵanyń!
Tunshyǵarsyń sháiitterdiń qanyna,
Jantalasyp, saia tappai janyńa.
Qara jerde titirkenip, jirenip,
Jan jolamas ólekseńniń mańyna!
12.05.1407 – 20.12.1986. Qaiym Muhamedhanov
Amantai Isinniń óleńge jazǵan komentariii:
«Máskeýdiń saiasi diktatýrasyna bolǵan qarsylyqty biliktiń jalǵan nasihattaýyna jáne 1986 jylǵy Almatydaǵy Jeltoqsan kóterilisi aiaýsyz basyp-janshylǵan keiingi kúnderde jazylǵan, ashýly óleń. «Jamalittenov» (solai jazylǵan) degen familiianyń astarynda, 1986 jyly halyq qozǵalysyn qaralaýshynyń rólin atqarǵan Qazaqstan Kompartiiasy Ortalyq Komitetiniń hatshysy Kamlidenov bolýy múmkin. Ony kóptegen adamdar Jeltoqsan tragediiasynyń eń negizgi sebepkeri retinde sanady. Taqyryptan keiingi jaqsha ishindegi «kom-n» degen sóz, qysqartylǵan «kommýnisten» degen sóz bolýy múmkin. Hidjra boiynsha datadan soń, jalpy qabyldanǵan jyl sanaǵy qoiylypty».
