Foto: pxhere.com / smugglaren
Búgin Májilistiń jalpy otyrysynda Premer-Ministrdiń orynbasary Tamara Dúisenova jaiylymdyq jerlerdi utymdy paidalaný qadamdary jaiynda aitty, dep habarlaidy Kazinform agenttigi.
«Jalpy, Aýyl sharýashylyǵyna memlekettik qoldaý kórsetý úshin Úkimet júieli sharalar qabyldap jatyr. Máselen, osy salaǵa bólingen sýbsidiia kólemi 430 mlrd teńgege deiin ósti. Kóktemgi egis jáne kúzgi egin oraǵy naýqanyna jyl saiyn beriletin jeńildetilgen nesie kólemi 70-ten 140 mlrd teńgege artty. Salaǵa salynǵan investitsiialardyń kólemi 72 paiyzǵa artyp, 850 mlrd teńgege deiin jetti», - dedi Dúisenova.
Onyń aitýynsha, azyq-túlik qaýipsizdigin qamtamasyz etý isinde elimizdiń jer resýrstaryn, onyń ishinde aýyl sharýashylyǵy maqsatyndaǵy jerlerdi utymdy jáne tiimdi paidalaný máselesi óte ózekti.
«Osy oraida paidalanylmai bos jatqan nemese bir kezde zańsyz berilgen aýyl sharýashylyǵy jerlerin, onyń ishinde jaiylymdyq jerlerdi qaitarý úshin belsendi jumys jalǵasyp jatyr. 2022 jyldyń basynan beri 8,5 mln gektardan astam jer qaitaryldy, onyń 2,8 mln gektary qazirdiń ózinde eldiń igiligine berildi. Qaitarylǵan jerdiń kóbi halyqqa mal jaiý úshin berilip jatyr. Bul rette tiisti zańnamalyq aktilerge jaiylymdardy paidalaný máselesi boiynsha ózgerister engizý úshin Parlament depýtattarynyń bastamasymen aýqymdy jumys jasalyp jatqanyn atap ótkim keledi. Bul ózgerister, jaiylymdardy basqa jer túrlerine aýystyrýǵa tyiym salý, olardy mal jaiý úshin rezervke qoiý, jaiylymdyq jerlerdi alý normativterin ulǵaitý jáne basqa da normalar arqyly jaiylymdyq jerlerdi utymdy paidalanýǵa múmkindik beredi», - dedi Úkimet basshysynyń orynbasary.
