Qazaqstandyq aýyratlet Svetlana Podobedova HOK-tyń Londonda jeńip alǵan Olimpiada medalin qaitarý týraly sheshimine qatysty pikirin bildirdi. Vesti.kz saityna bergen suhbatynda ol medaldiń ózine ǵana emes, Qazaqstan halqyna tiesili ekenin aityp, ony qaitarmaitynyn málimdedi.
"(...) Árine, oqiǵa jaqsylyqpen aiaqtalady degen úmitimiz boldy, barlyǵy da qate bolyp, qorqynyshty tústei óte shyǵady dep oilap, jattyǵýymyzdy jalǵastyrdyq, biraq... Bizdi Olimpiadaǵa jibermegende munyń barlyǵy ne úshin bolyp jatqany túsinikti boldy... Munyń bári artta qaldy. HOK otyrysynan óz basym jaqsy jańalyq kútpedim, sebebi olar óz sheshimin eshqashan ózgertpegen. Árine, Mádeniet jáne sport ministrligi, Ulttyq Olimpiada komiteti, bizdiń federatsiia biz úshin sońyna deiin kúresti, advokat jaldady, biraq WADA qatelestik demeitin shyǵar, onyń máni de joq, sebebi ózderiniń negizgi jumysy bitti - álemniń úzdik sportshylary Olimpiadaǵa qatysa almady...", - dedi Svetlana Podobedova.
"Medaldi qaitarýǵa nietim joq. Medal úshin kúrestim, óz eńbegimmen aldym, kóptegen jattyǵýymnyń arqasy. Sol kezde osy meldal úshin búkil Qazaqstan qýandy, sebebi bul medal meniki ǵana emes, Qazaqstan halqyna tiesili. Biz ony ne úshin qaitarýymyz kerek? Ony bizge sol kezde ne úshin berdi? 10 jyldan keiin biraq bermei me. Joq, muny talqylaýǵa da kelmeidi. Bizdi Olimpiadaǵa deiin de, keiin de tekserdi - bári durys bolatyn. Al tórt jyldan keiin ne bolǵany áli kúnge deiin jumbaq. Eger qajet dep jatsa, kóshirmesin jasatamyn da, jibere salamyn", - dedi aýyratlet.
Eske salaiyq, Halyqaralyq aýyr atletika komiteti 2008 jylǵy Olimpiadanyń kúmis júldegeri Taimýraz Tigievtiń medalin qaitarý týraly sheshim qabyldaǵan. Ziltemirshiler Maiia Maneza, Svetlana Podobedova jáne Zúlfiia Chinshanlo 2012 jylǵy Olimpiadanyń altyn medaldarynan aiyrylǵan. Barlyq sportshynyń qanynan biyl tyiym salynǵan zattar tabylǵan edi.
