Elordada qaita synama tapsyrǵan 19 adamnan koronavirýs infektsiiasy tabyldy. Bul týraly elordanyń Qoǵamdyq densaýlyq saqtaý basqarmasynyń basshysy Sáýle Qisyqova aityp berdi, dep habarlaidy QazAqparat.
Qazirgi ýaqytta elordada virýs juqtyrǵandar sany 264 adamǵa jetti. Sońǵy eki kúnde - 12-13 sáýir kúnderi 29 jaǵdai tirkeldi.
«19 jaǵdai - ókpeniń ekijaqty qabynýy, tynys alý qiyndyǵy boiynsha birneshe kúnnen beri statsionarda jatqan naýqastardan tabyldy. Olardyń alǵashqy synamasynda koronavirýs infektsiiasy tabylmaǵan edi», - dep atap ótti basqarma basshysy «Habar 24» telearnasyndaǵy brifingte.
Biraq, KVI diagnostikalaý men emdeý hattamasynda aýrý belgileri (rentgenogrammada nemese kompiýterlik tomografiiada ókpeniń ekijaqty ózgeriske ushyraýy) baiqalǵan adamdardan qaita synama alý usynylǵan.
«Osylaisha, dárigerler qaita synama alǵan 19 naýqastan infektsiia tabyldy. Bul ádis arqyly koronavirýs infektsiiasyn diagnostikalaý men emdeý tiimdi bolady. Taǵy 7 oqiǵa - naýqastarmen bailanysta bolǵandar, otbasy músheleri nemese birge jumys istegender arasynan tabyldy. Olar buǵan deiin oqshaýlanyp, tekserýden ótken jáne infektsiia rastalǵandyqtan, aýrýhanaǵa jatqyzyldy. Al 3 oqiǵa - koronavirýs infektsiiasy boiynsha júrgizilgen monitoring barysynda tabyldy», - dedi Sáýle Qisyqova.
