Aiaq kiimniń juby teń bolǵanymen birdei emes. Ońyn sol aiaǵyńa, solyn oń aiaǵyńa tetir kie alasyń ba? Kie almaisyń. Kúshtep kiseń aiaǵyndy aýyrtyp, eki basy eki baǵytqa qarap turady. Bulai uzaq ýaqyt júre de almaisyń. Áielden erkek jasaý da solai.
Áiel men erkek teń be? Teń! Biraq birdei emes.
Árqaisysynyń óz tabiǵaty men bolmysyna sai minezi men mindeti bolýǵa tiis. Áiel balasy bala tapsa, tabiǵatyna sai analyq mindetin atqarǵany emes pe? Áiel kúieýine dámdi tamaǵyn usynyp, kiimin jýyp, jaǵdaiyn jasap jatsa, muny kem bolǵany úshin emes, erin, balalarynyń ákesin qurmet tutqany úshin jasaidy. Otbasy jylýyn arttyrý úshin isteidi.
Erkek pen áiel esh aiyrmashylyqsyz birdei bolǵanda, Alla erkek-áiel dep bólip jatpai bir ǵana jaratylys jasar edi.
Bizdiń qoǵamymyzda áiel balasy dál búgingidei erkin bolǵan emes. Oqýyn oqyp, qalaǵanyn kiip, baratyn jerine emin-erkin baryp júr. Jumys isteimin degeni jumysyn, jeke kásippen ainalysamyn degeni kásibin dóńgeletýde.
Turmystyq zorlyq-zombylyqtyń aldyn alý úshin arnaiy zań bar. Zorlyq kórgen áiel kisiler telefon shalyp, dabyl qaqsyn. Sotqa bersin. Zań jumys istemese, sony kótersin. Al turmystyq zorlyq-zombylyqty syltaýratyp, “jatyrym ózimdiki”, “ana bolý mindet emes” sekildi teksizdik pen arsyzdyqty nasihattaý, ǵasyrlar boiy jalǵasyp kele jatqan otbasy qundylyqtaryna shabýyl jasaý, qazaqtyń bolashaǵyna balta shabý.
Qoǵamymyzda áielin adam qurly kórmeitin, bolmashy nársege bola kók-ala etip sabaityn, kez-kelgen jaǵdaida áieldi kináli etip shyǵaratyn erkekter de, kelinin kúń sekildi kóretin eneler de bar. Ony joqqa shyǵara almaimyz. Osyndai nadandyqpen aǵartýshylyq arqyly, zańnyń aiasynda kúresýimiz kerek. Biraq bularmen kúresemiz dep, áielge sheksiz erkindik berý, nekesiz jynystyq qatynasty mádeniet, jezókshelikti adal quqyly mamandyq etýdi suraý - adasý, qoǵamdy buzý bolmaq.
