Sybailas jemqorlyqqa qarsy qyzmet Qairat Satybaldyulyna qatysty qylmystyq isterdi tergeý sheńberinde memleketke 2024 jyldyń basynan bastap qosymsha 44,6 mlrd teńge qaitardy, dep habarlaidy "Ult aqparat".
Antikor tóraǵasy Ashat Jumaǵali El Prezidenti Q. Toqaevtyń Úkimettiń keńeitilgen otyrysynda aitylǵan tapsyrmalaryn iske asyrý boiynsha qurylymdyq jáne aýmaqtyq departament basshylarymen jedel keńes ótkizdi.
Keńes barysynda Qairat Satybaldyulyna qatysty qylmystyq isterdi tergeý sheńberinde memleketke 2024 jyldyń basynan bastap qosymsha 44,6 mlrd teńge qaitarylǵany aityldy.
Qazirgi ýaqytta qarajat memleketke keltirilgen zalaldy óteý esebinen respýblikalyq biýdjetke jiberildi.
Sonymen qatar, Prezident ekonomikaǵa jańa serpin berý úshin kásipkerlermen jáne investorlarmen tolyqqandy seriktestik qurý qajettigine nazar aýdardy.
Bir jyl buryn Antikormen biznesti qorǵaý jumysy aiasynda «Bizneske jol» jobasy iske qosyldy. Ol jergilikti jerlerde kásipkerliktiń damýyna kedergi keltiretin júieli ákimshilik kedergilerdi joiýǵa arnalǵan. Joba iske qosylǵan sátten bastap 600-den astam problemalyq keis sheshilip, 30 myńǵa jýyq kásipkerge kómek kórsetildi.
Sondai-aq, Prezident Qasym-Jomart Toqaev óz sózinde jemqorlyq áli de ekonomikanyń damýyn tejeitin faktorlardyń biri bolyp qala beretinin atap ótti. Bul baǵytta tsifrlyq tehnologiialardy, onyń ishinde «aqshany boiaý» jáne «tsifrlyq teńgeni» qoldaný tetikterin odan ári engizý mańyzdy bolyp tabylady.
Memleket basshysynyń tapsyrmasyna sáikes jáne sybailas jemqorlyqqa qarsy saiasat Tujyrymdamasyn iske asyrý sheńberinde Agenttik Qarjy ministrligimen jáne Ulttyq Bankpen birlesip osy quraldardy engizýdi jalǵastyrady.
Qazirgi ýaqytta «aqshany boiaýdy» pilottyq engizý úshin avtojoldar salý, aýyl sharýashylyǵy tehnikasy men jabdyqtaryn satyp alý, sondai-aq Áleýmettik-kásipkerlik korporatsiialardyń qarajatyn paidalaný salalary aiqyndalǵan. Antikor basshysynyń aitýynsha, Prezident tapsyrmasyna sáikes, bul protsess nysandardyń qurylys salasyna da taralatyn bolady.
«Biýdjetten bólingen qarjy túpki maqsatyna jetýi kerek. Bizdiń súiemeldeýimizdegi qurylystary uzaqqa sozylǵan nysandardyń ýaqtyly berilmei, sapasyz salynýy kóbine aqshany jymqyrý nemese sheneýnikterge odan ári keri qaitarý saldarymen jáne basqa da quqyqbuzýshylyqtarmen bailanysty ekenin bárimiz bilemiz.
Tsifrlyq teńge qural retinde «aqshany boiaý» institýtyn iske asyrýǵa septigin tigizedi. Tsifrlyq teńgeniń algoritmderi bolǵandyqtan, óziniń izderi bar. Mysaly, qarajat jalaqyǵa bólinse, basqa baǵytqa ketpei, eńbekaqy, taýarlar men qyzmetterdi satyp alý jáne salyq tóleý boiynsha igeriledi.
Bólingen qarjy qozǵalysynyń rásimderi ashyq bolyp, barlyq aýdarym óz maqsatyna jetip, ár teńge kózdelgen maqsatyna jumsalýy tiis», - dedi Ashat Jumaǵali.
