Konstitýtsiialyq Keńestiń tóraǵasy Qairat Mámi Sot ákimshiligi jónindegi halyqaralyq qaýymdastyqtyń Prezidenti Mark Biir myrzany qabyldady, dep habarlaidy "Ult aqparat" vedomstvonyń baspasóz qyzmetine silteme jasap.
Qazaqstandyq taraptan kezdesýge AHQO basqarýshysy Qairat Kelimbetov te qatysty.
Kezdesý barysynda Konstitýtsiialyq Keńestiń tóraǵasy sheteldik qonaqty Konstitýtsiialyq Keńestiń Negizgi Zańnyń ústemdigin qamtamasyz etý jónindegi qyzmetimen, sondai-aq 2017 jyly Qazaqstanda júrgizilgen konstitýtsiialyq reformanyń negizgi, onyń ishinde «Astana» halyqaralyq qarjy ortalyǵyndaǵy erekshe quqyqtyq rejimge qatysty baǵyttarymen tanystyrdy.
Budan basqa, taraptar aǵymdaǵy jylǵy qyrkúiek aiynda Astana qalasynda Halyqaralyq Sýdialar qaýymdastyǵy (HSQ) men Sot ákimshiligi jónindegi halyqaralyq qaýymdastyqtyń (SÁjHQ) birlesken forýmyn uiymdastyrý jáne ótkizý máselelerin talqylady.
Qazaqstan Sýdialar odaǵy HSQ-qa 2004 jyly ekstraordinarlyq múshe retinde kirdi, al 2011 jyly osy bedeldi halyqaralyq qurylymnyń tolyqqandy múshesi boldy. 2016 jyldan bastap Qazaqstan SÁjHQ jumysyna qatysady.
Sheteldik qonaq ulttyq sot júieleriniń aldynda turǵan jalpy mindetterdi sheshý úshin halyqaralyq sot qaýymdastyǵyn shoǵyrlandyrýǵa baǵyttalǵan SÁjHQ-nyń qyzmeti týraly habardar etti.
Qoryta kele, Qairat Mámi sheteldik áriptesine Qazaqstanda júrgizilip jatqan quqyqtyq reformalarǵa úlken qyzyǵýshylyq tanytqany úshin alǵys aityp, quqyq ústemdigi qaǵidattaryn bekitý salasyndaǵy yntymaqtastyqtyń tabysty jalǵasatynyna senim bildirdi.
