Prezident Jarlyǵymen Qairat Kelimbetov Strategiialyq josparlaý jáne reformalar agenttiginiń tóraǵasy bolyp taǵaiyndaldy, dep habarlaidy Aqorda.
«Astana» halyqaralyq qarjy ortalyǵynyń basqarýshysy Qairat Nematuly Kelimbetov Qazaqstan Respýblikasynyń Strategiialyq josparlaý jáne reformalar agenttiginiń Tóraǵasy bolyp taǵaiyndalsyn» delingen Prezident Jarlyǵynda.
Eske sala keteiik, buǵan deiin Memleket basshysy Qasym-Jomart Toqaev Qazaqstan halqyna Joldaýynda biyl strategiialyq josparlaý jáne reformalar jónindegi agenttik qurylatynyn málim etken bolatyn.
9 qyrkúiekte Memleket basshysynyń Jarlyǵymen Qazaqstanda Strategiialyq josparlaý jáne reformalar agenttigi, sondai-aq Básekelestikti qorǵaý jáne damytý agenttigi quryldy.
Qairat Kelimbetov 1969 jyly 28 qańtarda Almaty qalasynda dúniege kelgen.
M.Lomonosov atyndaǵy Máskeý memlekettik ýniversitetin, Qazaq memlekettik basqarý akademiiasy janyndaǵy Naryq institýtyn, Djordjtaýn ýniversitetiniń (AQSh, Vashington) arnaýly baǵdarlamasyn bitirgen.
1996-1997 jyldary - Qazaqstan Respýblikasy Prezidenti janyndaǵy Joǵary ekonomikalyq keńes hatshylyǵynyń aǵa sarapshysy, Qazaqstan Respýblikasy Strategiialyq josparlaý agenttiginiń departament direktorynyń orynbasary, direktory.
1997-1998 jyldary - Qazaqstan Respýblikasy Strategiialyq josparlaý jáne reforma agenttiginiń departament direktorynyń orynbasary. 1998-1999 jyldary - Qazaqstan Respýblikasy Prezidenti Ákimshiliginiń bólim meńgerýshisi. 1999-2001 jyldary - Qazaqstan Respýblikasy Strategiialyq josparlaý agenttiginiń tóraǵasy, Qazaqstan Respýblikasynyń birinshi qarjy vitse-ministri. 2001-2002 jyldary - Qazaqstan Respýblikasynyń birinshi qarjy vitse-ministri.
2002-2006 jyldary - Qazaqstan Respýblikasynyń Ekonomika jáne biýdjettik josparlaý ministri. 2006-2008 jyldary - «Qazyna» ornyqty damý qory» aktsionerlik qoǵamynyń basqarma tóraǵasy. 2008 jyly qańtardyń 23-inde Memleket basshysynyń Jarlyǵymen Qazaqstan Respýblikasy Prezidenti Ákimshiliginiń basshysy bolyp taǵaiyndaldy.
2008 jylǵy qazannyń 13-inen - «Samuryq-Qazyna» Ulttyq ál-aýqat qory» AQ basqarma tóraǵasy. 2011 jylǵy sáýirden - QR Ekonomika jáne saýda ministri. 2012 jylǵy 20 qańtarda Memleket basshysynyń Jarlyǵymen QR Premer-Ministriniń orynbasary qyzmetine taǵaiyndaldy.
2013 jyldyń qazanynan QR Ulttyq Bankiniń tóraǵasy qyzmetin atqardy.
2015 jylǵy jeltoqsan aiynan «Astana» halyqaralyq qarjy ortalyǵynyń basqarýshysy bolyp qyzmet etip keledi.
«Qurmet» ordenimen (2005), «Parasat» medalimen (2010) marapattalǵan.
