© Sputnik / Vladislav Vodnev
Elordanyń Saryarqa aýdandyq №2 soty Qairat Boranbaevqa qatysty qylmystyq is boiynsha úkim shyǵardy. Belgili kásipker 8 jylǵa sottaldy.
«QR Qylmystyq kodeksi 58-babynyń 3-bóligine sáikes Boranbaev, Nahanovtyń múlkin tárkilep, 8 jylǵa bas bostandyǵynan aiyrý túrindegi jaza taǵaiyndalsyn. Olar ómir boiy memlekettik qyzmette, sotta, jergilikti ózin-ózi basqarý organdarynda, Ulttyq bank pen oǵan qarasty vedomstvolarda, Qarjy naryǵyn retteý, baqylaý jáne qadaǵalaý jónindegi ýákiletti organda qyzmet atqarý quqyǵynan airylsyn. Sonymen qatar, qarjy uiymdarynda, memlekettik uiymdarda, kvazimemlekettik sektor sýbektilerinde qyzmet etýge de tyiym salynady», - dedi úkimdi oqyǵan sýdia Nazgúl Bapaqova.
QazAqparat agenttiginiń jazýynsha, sot úkiminde Qairat Boranbaevqa berilgen memlekettik nagradalardy keri qaitarý týraly aitylǵan.
«Qylmystyq kodekstiń 49-baby 2-bóligine sáikes Qairat Boranbaevty memlekettik nagradalardan aiyrý týraly usynys engizilsin», - dedi sýdia.
Al kásipkerge berilgen memlekettik nagradalar qatarynda «Qurmet», «Eren eńbegi úshin», «Parasat» jáne III dárejeli «Barys» ordeni bar.
«Memleket múddesine Q. Boranbaevtyń ál-Farabi kóshesindegi (Almaty qalasy) úi-jai men jer ýchaskesi, «Qazaqstan Halyq banki» AQ shotyndaǵy 1 mlrd 270 mln 190 myń teńge somasyndaǵy qarajat tárkilensin. Sonymen qatar, «Qazaqstan Halyq banki» AQ-daǵy eki shotqa bólinip salynǵan 2 mlrd 847 mln 877 myń 603 teńge de tárkilensin. Atalǵan shottaǵy qalǵan somaǵa arest qoiylsyn», - dedi Nazgúl Bapaqova.
Aita keteiik, "AziiaGazChýndja" JShS quryltaishylary Qairat Boranbaev pen onyń biznes-seriktesi Roman Nahanov, sondai-aq "Qazaq Gaz" AQ basqarma tóraǵasynyń burynǵy orynbasary Taiyr Januzaq suiytylǵan munai gazyn satyp alý kezinde 14,5 mlrd teńgeni qylmystyq jolmen zańdastyrǵany úshin aiyptalǵan bolatyn. "Qazaq Gaz" kompaniiasyna kelgen shyǵyn tolyǵymen óteldi. Aqsha ulttyq kompaniianyń shottaryna aýdaryldy.
Qarjylyq monitoring agenttigi de gaz eksporty kezindegi jymqyrý jáne qylmystyq jolmen tabylǵan múlikti zańdastyrý isteri aiasynda Boranbaev pen basqa tulǵalarǵa qatysty sotqa deiingi tergeý júrgizgen.
Qairat Boranbaev – qazaqstandyq kásipker, Nursultan Nazarbaevtyń burynǵy qudasy. Onyń qyzy Álima Dariǵa Nazarbaevanyń uly Aisultanǵa turmysqa shyqqan bolatyn. Aisultan 2020 jyly tamyz aiynda qaitys boldy.
