Álemdik qoǵamdastyq Birikken Ulttar Uiymynyń 7-shi Bas hatshysy Kofi Annanmen qoshtasýda. Osy oraida "Ult aqparat" QR Syrtqy ister ministri Qairat Ábdirahmanovtyń Kofi Annannyń qaitys bolýyna orai jazǵan maqalasyn oqyrman nazaryna usynady.
K. Annan - Birikken Ulttar Uiymynyń tarihynda ózindik orny bar erekshe tulǵa. Ol BUU basshylyǵyndaǵy Afrikanyń birinshi ókili. Uiymnyń ózinde mansap qurǵan birinshi Bas hatshy. K.Annan jahandyq qaýipterge qarsy turý jolynda uiymnyń tiimdiligin arttyrýǵa baǵyttalǵan reforma júrgizdi, AITV-men kúresýge kóp kúsh saldy jáne BUU Jahandyq kelisimin júzege asyrdy. Birikken Ulttar Uiymynyń Bas hatshysy bolǵan jyldary K. Annan Beibitshilik jónindegi komissiiany jáne Adam quqyqtary jónindegi keńesti qurdy. 2001 jyly K. Annan ózi basshylyq etken uiymmen birge «Álemdegi berik beibitshilikke jáne tiimdi uiymdy qamtamasyz etýge úles qosqany úshin» Nobel syilyǵyna ie boldy.
K.Annan aimaqtyq jáne etnikalyq qaqtyǵystardy oqshaýlaýǵa jáne olardyń aldyn alý máselelerine úlken mán berdi. Onyń kómegimen 28 bitimgerlik operatsiiasy ótkizildi - bul K. Annannyń atalǵan laýazymǵa kelýine deiin BUU ótkizgen bitimgerlik operatsiialardan eki ese artyq.
K.Annan BUU-nyń Ortalyq Aziia óńirindegi rólin kúsheitýde mańyzdy ról atqardy. Bas hatshy Qazaqstan Respýblikasynyń Prezidenti Nursultan Nazarbaevtyń halyqaralyq bastamalaryna qoldaý kórsetti.
1994 jyly jeltoqsanda Býdapeshtte ótken EQYU sammitinde Prezident Nursultan Nazarbaev bolýy múmkin qaqtyǵystardyń aldyn alý jáne Ortalyq Aziiadaǵy beibitshilikti nyǵaitý jónindegi sharalardy júzege asyrý týraly ideialardy usyndy. K. Annan Qazaqstannyń atalǵan bastamasyn qoldady jáne Ortalyq Aziiada BUU-nyń Bitimgershilik batalony quryldy. Bul aimaq memleketteriniń BUU-men beibitshilik ornatý salasyndaǵy yntymaqtastyǵynyń alǵashqy tájiribesi boldy.
K.Annan - Qazaqstanǵa saparmen kelgen alǵashqy BUU Bas hatshysy. 2002 jylǵy qazanda ótken resmi sapary aiasynda Prezident N. Nazarbaev K. Annanǵa Bas hatshynyń jeke basyn qurmetteý men onyń Birikken Ulttar Uiymyn damytýǵa qosqan úlesin moiyndaýdyń belgisi retinde Qazaqstan Respýblikasynyń I dárejeli «Dostyq» ordenin tabystady. Qazaqstan Respýblikasynyń Prezidentine jáne Qazaqstan halqyna alǵys bildire otyryp Kofi Annan qazaq tilindegi «Dostyq» sózi búkil álemge qajet ekendigin atap ótti.
«Naryqtyq ekonomikaǵa ótýde úlken nátijelerge qol jetkizdińiz, ekonomika men investitsiianyń aitarlyqtai ósýin qamtamasyz ettińiz, eldegi turaqtylyqty saqtai bildińiz, aimaqtyq qaqtyǵystardy boldyrmaý jolynda qandai kóshbasshy bolý kerektigin kórsettińiz, iadrolyq qarýsyzdanýǵa qatysty batyl sheshim qabyldadyńyz», - dep atap ótti Bas hatshy. Sonymen qatar, K.Annan Qazaqstandy álemniń basqa memleketteri úshin ultaralyq kelisim, turaqty ári ornyqty damýdyń úlgisi retinde atap kórsetti.
Qazaqstan Respýblikasynyń Prezidenti N. Nazarbaev óziniń kóńil aitý jedelhatynda: «Halyqaralyq deńgeidegi tanymal saiasatker K. Annan búkil ǵumyryn álemde turaqtylyq pen beibitshilik ornatýǵa arnady. Osydan biraz jyl buryn Kofi Annan syndy parasatty, adal ári meiirban tulǵamen tanystym. Jahandyq damýdyń ózekti máselelerine qatysty ustanymdarymyz uqsas bolatyn. Men áli kúnge deiin kezdesýlerimiz ben ózara áńgimelesken sátterimizdi jyly sezimmen eske alamyn» - dep atap ótti.
K.Annan reformator, bitimger jáne álemniń shynaiy azamaty retinde jadymyzda máńgi qalmaq.
