Qazaqstannyń tórt aýmaǵynda 70 orman jáne 513 dala órti tirkeldi. Bul týraly Ortalyq kommýnikatsiialar qyzmetindegi brifingide QR ishki ister ministriniń orynbasary Iýrii Ilin aitty, dep habarlaidy "Ult aqparat".
«Qazirgi ýaqytta biz órtke qarsy sharalardy júzege asyrýǵa kirisip kettik. Buǵan deiin aitanymyzdai, Qazaqstan aýmaǵyna kóktem 2 apta jýyq erte keldi. Sondyqtan órt qaýpi Túrkistan, Batys Qazaqstan, Almaty jáne Pavlodar oblystarynda saqtalyp otyr. Bul óńirlerde 70 orman órti jáne 513 dala órti tirkeldi», - dedi ministr orynbasary.
Onyń aitýynsha, osyǵan bailanysty oblystyq tótenshe jaǵdailar departamentteriniń mamandary jergilikti politsiia qyzmetkerlerimen birge orman alaptary men adamdar demalatyn jerlerdi sholǵyndaý jumysyna kirisken.
«156 adam ustalyp, ákimshilik jaýapkershilikke tartyldy. Olarǵa orman jáne dala órtteriniń shyǵýyna sebep bolǵany úshin aiyppul salyndy. Bul jumystar aldaǵy ýaqytta da jalǵasa beredi», - dedi Iýrii Ilin.
