Byltyr elge shaqyrylǵan sheteldik jumysshylardyń kóbi Qytai, Túrkiia jáne Úndistan elderinen kelgen, dep habarlaidy QazAqparat.
Bul týraly «Eńbek resýrstaryn damytý ortalyǵynyń» strategiia jáne jobalyq basqarý departamentiniń direktory Aleksandra Molchanovskaia málim etti.
«Ózbekstannan keletin mamandar negizinen qurylys jáne aýyl sharýashylyǵy salasyndaǵy jumystarǵa tartylady. Sondyqtan olardy maýsymdyq migranttar deýge de bolady. Óńirler arasynda ózbekstandyq jumysshylardy Shyǵys Qazaqstan, Atyraý jáne Batys Qazaqstan oblystary kóbirek shaqyrady. Statistikaǵa súiensek, jeke tulǵalar 2020 jyly 310 myń shetel azamatyn jumysshy retinde elge alǵyzǵan», - deidi sarapshy.
Onyń aitýyna qaraǵanda, mundai tendentsiia áli de jalǵasady.
«Eldegi qurylys kompaniialary da, aýyl sharýashylyǵyndaǵy kásiporyndar da biliktiligi tómen sheteldikterdi aldyrady. Olar tóleitin ailyqqa qazaqstandyq jumysshylar jaldanǵysy kelmeidi. Óitkeni jumys aýyr, ailyq tómen bolyp otyr. Bul tendentsiia áli de jalǵasatyn túri bar», - dedi ortalyqtyń departament direktory.
Resmi statistika boiynsha, 2020 jyly Qazaqstanǵa 14 myń sheteldik jumysshy kvotamen tartyldy.
«Bul - 2019 jylǵy kórsetkishten 1,9 myń adamǵa az. Byltyr el aýmaǵynda 104 eldiń azamaty eńbek etken. Ásirese Qytai, Túrikiia jáne Úndistannan kóp kelgen. Sheteldik jumysshylardy tartý kórsetkishi boiynsha Atyraý oblysy alda tur. Shetelden tartylǵan jumysshylardyń 40 paiyzy osy oblysta eńbek etken. Sheteldik eńbek migranttarynyń 45 paiyzy qurylysta jumys istedi. Olardyń 69 paiyzy - joǵary bilikti, 26 paiyzy - ortasha bilikti bolǵan. Ásirese injenerlerge suranys joǵary», - dedi Aleksandra Molchanovskaia.
