Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine ónerkásiptik qaýipsizdik máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasy ónerkásiptik qaýipsizdik salasyndaǵy zańnama normalaryn jetildirý, qaýipti nysandarda ónerkásiptik qaýipsizdik salasyndaǵy memlekettik qadaǵalaýdy júzege asyrýdyń tiimdiligin arttyrýǵa, ónerkásiptik qaýipsizdik salasynda jumys isteýge tartylatyn attestattalǵan jáne avariialyq-qutqarý jumystaryn júrgizý boiynsha qyzmet kórsetetin uiymdardyń qyzmetin retteýge baǵyttalǵan.
«Kásiporyndarda óndiristik baqylaý rólin arttyrý maqsatynda óndiristik baqylaý qyzmetteriniń laýazymdy tulǵalarynyń qyzmetin reglamentteý jáne olardyń mártebesin kúsheitý usynylady. Atap aitqanda, uiymnyń laýazymdy tulǵalaryn qyzmetkerlerdiń ómiri men densaýlyǵyna qaýip tóndiretin, talaptardy buza otyryp júzege asyrylatyn jumystardy toqtata turý ókilettigimen ónerkásiptik qaýipsizdiktiń jai-kúiin tekserýdi uiymdastyrý men júrgizý, sondai-aq ónerkásiptik qaýipsizdik talaptaryna sáikes kelmeitin adamdardy jumystan shettetý quqyǵyn berý usynylady», - dedi QR Indýstriia jáne infraqurylymdyq damý ministri Beibit Atamqulov.
Onyń sózine qaraǵanda, ónerkásiptik qaýipsizdik salasyndaǵy jumystardy júrgizý quqyǵyna attestattalǵan uiymdardyń jáne avariialyq-qutqarý jumystaryn júrgizý jónindegi qyzmetterdi usynatyn uiymdardyń qyzmetin retteý úshin zań jobasynda osy uiymdarǵa qadaǵalaýdy júzege asyrý kózdeledi.
«Qaýipti óndiristik nysandarda apattar men oqiǵalardy tergep-tekserýdi júrgizýdiń biryńǵai tártibin belgileý úshin apattar men intsidentti tergep-tekserý jónindegi komissiianyń ókilettikterin, olardy qurý tártibin, nátijelerin resimdeýdi jáne uiymdardyń tergep-tekserýler júrgizilgennen keiin is-qimyldaryn naqtylaý usynylady», - dedi ministr.
