Qaýipsizdik sertifikattary úshin bir top zańger «Beeline», «Tele2»/«ALtel», «Kcell» operatorlaryna qatysty sotqa shaǵym túsirdi, dep habarlaidy QazAqparat.
Zańgerlerdiń aitýynsha, «sertifikat Internetke kiretin árbir qurylǵyǵa ornatylýy tiis». Olar qaýipsizdik sertifikatyn ornatýdan keiin azamattardyń jeke derekterine qatysty quqyǵy buzylady dep alańdaidy. Al sot protsesi qoǵamnyń nazaryn osy máselege aýdarýǵa kómektesedi.
Óz kezeginde uialy bailanys operatorlary sotqa shaǵym jóninde pikir bildirdi.
«Meniń jeke pikirimshe, zańgerler sertifikatty joiýdy maqsat etip otyrǵan joq. Olar kezekti haipty paidalanyp, ózderine nazar aýdartqysy keledi. Eger olar shyn máninde sertifikat máselesin sheshkisi kelse, uialy bailanys operatorlaryna qarsy shaǵymdanbas edi. Operatorlar zańǵa sáikes jumys isteidi, QR zańyna sáikes, óz abonentterine qaýipsizdik sertifikatyn ornatý qajettigi týraly habarlaidy», - dedi «Altel» jáne «Tele2» kompaniialarynyń PR-direktory Oljas Bibanov.
Kompaniia ókili retinde Oljas Bibanov uialy bailanys operatorlary úshin zańgerler shaǵymynyń esh qaýip tóndirmeitinin jetkizdi.
«Biz eshqandai zańdyq qaýip-qater kórip otyrǵan joqpyz. Sebebi, barlyǵy zań júzinde jazylyp qoiǵan. Abyroi-bedel turǵysynda operatordyń teris imidji qalyptasady. Degenmen, kez kelgen adam qaýipsizdik sertifikatyn bailanys operatorlary oilap tappaǵanyn túsinedi», - dedi ol.
Onyń aitýynsha, zańgerler Qazaqstannyń birneshe qalasyndaǵy jekelegen operatorlardyń ústinen shaǵym túsirgen. «Tele2»/«Altel» áli shaǵym alǵan joq.
Sonymen birge, atalǵan oqiǵaǵa «Beeline Qazaqstan» kompaniiasy pikir bildirdi.
«Beeline Qazaqstan»qaýipsizdik sertifikatyn jasap shyǵarǵan joq jáne Internet resýrstaryna esh shekteý qoimaidy. QR «Bailanys týraly» zańyna sáikes, bailanys operatorlary qaýipsizdik sertifikatyn óz abonentteri arasynda taratýdy qamtamasyz etedi», - dep jaýap berdi Beeline kompaniiasynyń baspasóz qyzmeti.
Iaǵni, kompaniia qaýipsizdik sertifikatyn ornatýdy talap etý emes, abonentterge aqparat taratýmen ainalysyp jatqanyn jetkizdi.
«Sot óndirisine qatysty barlyq suraqtarǵa zańgerlerimiz sotta jaýap berýge ázir. «Beeline» óz qyzmetin QR zańnamasyna sai júrgizip keledi. Biz azamattardyń týyndaǵan máseleni zańdyq jolmen, onyń ishinde sot arqyly sheshýge tyrysqanyn qoldaimyz», - deidi kompaniia.
