«Qazaq onkologiia jáne radiologiia ǵylymi-zertteý institýty» AQ basqarma tóraiymynyń klinikalyq jumys jónindegi orynbasary Nurlan Baltabekov «Ókpe qaterli isigi. Ozyq sheshimder» taqyrybynda ótip jatqan onlain halyqaralyq konferentsiiada qaterli isikti erte anyqtap, emdeýdiń mańyzdylyǵy týraly aitty, dep habarlaidy QazAqparat.
Nurlan Baltabekov Qazaqstanda ókpeniń qaterli isigi sońǵy 25 jyl ishinde qaterli isik óliminiń qurylymynda birinshi orynda turǵanyn atap ótti. Eldegi árbir besinshi onkologiialyq naýqas ókpeniń qaterli isiginen qaitys bolady.
«Qaterli isiktiń asqynǵan túri men erte anyqtalǵan túrin emdeý - bul eki túrli baǵyt. Sonymen, ókpeniń qaterli isiginiń birinshi kezeńi ýaqtyly hirýrgiialyq emdeýmen, ásirese limfa túiinderin torakoskopiialyq jolmen alyp tastaý patsientterdiń 90% -dan astamyn bes jyldan astam ómir súrýge múmkindik beredi», - Nurlan Baltabekov aitty.
Ol ókpeniń qaterli isiginiń keibir túrlerin, mysaly, adenokartsinomamen aýyratyn naýqastardy onkologtardyń kómegimen jáne jańa tehnologiialardy engize otyryp aman alyp qalýǵa bolady.
«Buryn bizde tórtinshi satydaǵy ókpeniń qaterli isigi bar naýqastar bes jyl ómir súre alamaityn. Maqsatty emdeýdiń jańa tehnologiialaryn engizý keibir patsientterge, shamamen 1/4, tórtinshi kezeńde de uzaq ómir súrýge múmkindik berdi. Biraq osyndai bir naýqasty emdeý úshin jylyna 40 mln teńge jumsalady.Sondyqtan ókpeniń qaterli isigin erte diagnostika arqyly anyqtaý qajet.Tek sol kezde ǵana metastazdardyń paida bolýyna jol berilmeidi», - dedi ol.
Qaterli isikti baqylaý jónindegi halyqaralyq agenttiktiń ókili doktor Andrea Karvalo tómen dozaly kompiýterlik tomografiia kómegimen ókpe qaterli isigine skrining ótkizýdiń tiimdiligi týraly aitty.
«Qazirgi tańda ókpe ragynan bolatyn ólimdi azaitýdyń birden-bir joly ony erte kezeńde anyqtaý bolyp otyr. Skrining júrgizilgende qatysýshylardyń 50-70%-de isiktiń I satysy anyqtalady. Sondyqtan osyndai skriningti tekseristerdi keshendi túrde ótkizý qajet. Ol úshin tómen dozaly kompiýterlik tomografiia qoldanylady. Máselen, 2020 jyly osyndai skriningtiń arqasynda ókpe ragynyń I satysynda – 58,6%, II satysynda – 9,3%, III satysynda – 9,9%, IV satysynda – 9,4%-y anyqtalǵan. Kórip otyrǵandaryńyzdai raktyń 70 paiyzdaiy I jáne II satysynda anyqtalǵan, bul emdeýge jatatyn kezeń», - deidi sarapshy.
Aita keteiik, Almatyda «Qazaq onkologiia jáne radiologiia ǵylymi-zertteý institýty» AQ, «Qazaqstandyq onkologtar qaýymdastyǵy» QB-nyń uiymdastyrýymen ótip jatqan konferentsiiaǵa Italiia, Túrkiia, Ispaniia, Resei, Belorýssiia jáne Qazaqstannyń onkologiialyq ortalyqtardyń sarapshylary qatysyp jatyr.
