Bilim jáne ǵylym ministrliginiń saitynda kórsetilgen elektrondy oqýlyqtardy tegin júkteýge bolady. Aqyly qyzmetti alyp tastady. Bul týraly ministrlikke qarasty "Oqýlyq" respýblikalyq ǵylymi-praktikalyq ortalyqtyń direktory Ǵani Beisembaev málimdedi, dep habarlaidy Sputnik Qazaqstan.
Buǵan deiin oqýshylardyń ata-analary bilim jáne ǵylym ministrliginiń saitynda kórsetilgen elektrondy oqýlyqtardy júkteý qyzmetiniń aqyly bolyp ketkenine shaǵymdanǵan bolatyn. Oqýlyqtardyń tizimi ministrlik saitynda jariialansa da, olardy sheteldik platformaǵa júktep qoiǵan. Al kez kelgen oqýlyqtyń elektrondy nusqasyn alý úshin aqsha tóleý kerek.
Osy másele boiynsha túsinikteme bergen "Almatykitap" baspasynyń PR-direktory Olga Býzýlýtskaia elektrondy oqýlyqtardyń tótenshe jaǵdai rejimi kezinde tegin bolǵanyn, al 1 qyrkúiekten bastap aqyly júiege aýystyrylǵanyn jetkizdi. Sebebi opiq.kz saityn estondyq mamandar jasaǵan.
Endi, onyń tehnikalyq jáne basqa da shyǵyndaryn óteý kerek. Al ishki kontenttiń iesi – "Almatykitap" baspasy. Elektrondy oqýlyqtardy júkteý úshin aqy tólep, ai-saiyn jazylyp turý qajet nemese mektepke habarlasýǵa bolady. Mektep pen baspa arasynda kelisimshart jasalsa, muǵalimder men oqýshylar elektrondy oqýlyqtardy paidalana alady.
"Oqýlyq" respýblikalyq ǵylymi-praktikalyq ortalyqtyń direktory Ǵani Beisembaevtyń aitýynsha, ministrlik saitynda kórsetilgen barlyq oqýlyq tegin júkteledi. "Almatykitap" baspasy bolsa, tehnikalyq qatelik jasaǵan.
"Bilim jáne ǵylym ministrliginiń saitynda kórsetilgen elektrondy oqýlyqtardyń barlyq siltemesi tegin. Tehnikalyq sebepke bailanysty "Almatykitap" baspasy oqýlyqtardy tegin júkteý qyzmetin buzyp jiberdi", – deidi Beisembaev.
Qazirgi kezde ministrlik saitynda kórsetilgen oqý materialdaryn tegin júkteýge bolady.
