Foto: Qazaqgaz
Atyraý oblysynda Qashaǵan gazyn óńdeitin zaýyttyń qurylysy júrip jatyr. Endi Qatar kompaniiasy bul zaýyttyń 75 paiyz aktsiiasyn satyp alatyn boldy, habarlady ulttyq kompaniianyń baspasóz qyzmeti.
Doha qalasynda QazaqGaz, Power International Holding, KCG, HBP basshylary Qashaǵan gazyn óńdeý zaýytynyń qurylysyn jedeldetý máselesi talqylady.
«Atalǵan kompaniialar-merdigerlerdiń aktsionerleri jobany júzege asyrý statýsy, tapsyrmalar men atalǵan jobany jedeldetý boiynsha qabyldanyp jatqan sheshimder týraly esep berdi. Qazir Power International Holding-tyń enshiles kásiporny UCC Holding tarapynan gaz óńdeý zaýytynyń 75 paiyz bóligin satyp alý týraly kelissózder aiaqtaldy. Tranzaktsiia sharttaryn kelisý protsesi bastaldy», - dep habarlady ulttyq kompaniianyń baspasóz qyzmeti.
Qatarlyq UCC Holding kompaniiasy Atyraý oblysyndaǵy gaz óńdeý zaýyty jobasyna operatsiialyq baqylaý júrgizýdi qolǵa aldy. Endi bul kompaniia atalǵan joba operatory – «GPC Investment» JShS-ǵa kúrdeli qurylys boiynsha jańa atqarýshy direktor taǵaiyndaidy.
Sondai-aq, taraptar birlesken úsh jobany júzege asyrýdy jedeldetý máselesin qarastyrǵan. Birinshisi – «Qashaǵan» gazyn óńdeitin zaýyt jobasy. Onyń qýaty 2,5 mlrd tekshe metrdi quraidy. Ekinshisi – «Beineý-Bozoi-Shymkent» magistraldy gaz qubyrynyń ekinshi tarmaǵynyń qurylysy, al, úshinshisi – «Aqtóbe-Qostanai KS-14» jobasy.
Eske sala ketelik, budan buryn Qashaǵan gazyn óńdeitin zaýyt 2026 jyly iske qosylatynyn jazǵan bolatynbyz.
