Qazaqstan Prezidenti Qasym-Jomart Toqaev Qatar Ámiri Tamim ben Hamad Ál Tanimen kezdesti, dep habarlaidy "Ult aqparat" Aqordaǵa silteme jasap.
Memleket basshysy kezdesýde Qazaqstannyń Qatarmen yntymaqtastyqty joǵary baǵalaitynyn jáne ekijaqty bailanystardy nyǵaitýǵa nietti ekenin atap ótti.
– Bul kezdesýimizge óte qýanyshtymyn. Bizdiń elderimiz arasynda saýda-ekonomikalyq yntymaqtastyqty tereńdetýdiń múmkindikteri kóp. Qatardyń investitsiialyq áleýetin jaqsy bilemiz. Bizdiń memleketterimizdiń ózara is-qimyldaryn keńeitýge, sonyń ishinde Qatar elinen investitsiia tartý boiynsha tiisti tetikterdi iske qosýǵa niettimiz, – dedi Qasym-Jomart Toqaev.
Qatar Ámiri Tamim ben Hamad Ál Tani Qasym-Jomart Toqaevty Qazaqstan Respýblikasynyń Prezidenti bolyp sailanýymen taǵy da quttyqtap, elder arasyndaǵy ózara qarym-qatynastyń nyǵaia túsetinine senim bildirdi.
– Biz sizdiń elińizge investitsiia salýǵa niettimiz. Buǵan Qazaqstan da múddeli. Bizdiń yntymaqtastyǵymyzdy arttyrý baǵytynda birlesken tehnikalyq komissiia qurylsa, elderimizdiń ózara qarym-qatynasyna oń yqpalyn tigizedi dep oilaimyn, – dep atap ótti Tamim ben Hamad Ál Tani.
Kezdesý sońynda taraptar saýda-ekonomikalyq yntymaqtastyqty damytýǵa ýaǵdalasty. Qazaqstan Prezidenti Qasym-Jomart Toqaev Qatar Ámirine Fýtboldan álem chempionatyn abyroimen ótkizýge tilektestik bildirdi.
