Katar Irakta urlanǵan koroldik otbasynyń múshelerin bosatyp alý úshin bir milliard dollar qun tólegen, - dep jazady Financial Times basylymy óz derekkózine silteme jasap.
Óńirdegi qarýly toptar men úkimet ókilderiniń sózinshe, Doha Iraktyń ońtústiginde ustalǵan koroldik otbasynyń 25 múshesin jáne Siriiada jihadshylar ustaǵan 50 adamnyń quny retinde milliard dollar tólegen. Katardyń bul qarajatty "ál-Kaidamen" bailanysy bar, Siriiada soǵysyp jatqan uiymǵa jáne Irannyń qaýipsizdik qyzmetterine tólegeni aitylady.
Kelisim sáýirde jasalǵan delinedi. Katar úkimetine jaqyn derekkóz "tólemniń jasalǵanyn" habarlaǵan.
Áskeri kiim kigen belgisiz qarýly adamdar 2015 jyldyń jeltoqsanynda Nadjaf shólindegi Saýd Arabiiasymen shekara tustaǵy ań aýlaý lagerinde suńqar qus aýlaýshylardy urlap áketken. Irak politsiiasyndaǵy derekkóz urlanǵandardyń ishinde Katardaǵy bileýshi otbasynyń músheleri bolǵanyn málimdegen. Kepilge alynǵandardy bosatý boiynsha kelissózderdi Iran, Katar jáne livandyq "Hezbollah" qozǵalysy ózara júrgizgen, al 2016 jyldyń sáýirinde 26 ań aýlaýshy bosatylyp, Katardyń Iraktaǵy elshisine berilgen.
Eske salaiyq, dúisenbide Saýd Arabiiasy, BAÁ, Bahrein jáne Mysyr elderi Katarmen diplomatiialyq qarym-qatynasyn úzgenin málimdegen bolatyn. Olar Dohany BAQ-ty arandatýshylyq maqsatta qoldanyp, lańkestik is-áreketti qoldaýyn toqtatpady dep aiyptady. Al keiin Liviianyń shyǵys bóligindegi bilik, Maldiv araldary jáne Mavrikii de Katarmen bailanysyn úzgenin jariialady.
