Elimizde koronavirýs pandemiiasyna bailanysty qatań karantin is-sharalary engizilgen jaǵdaida 165 myń adam jumyssyz qalady. Bul týraly «Eńbek resýrstaryn damytý ortalyǵy» AQ prezidenti Dáýlet Arǵyndyqov aitty, dep habarlaidy QazAqparat.
«Bizdiń ortalyq mundai baǵalaý júrgizdi. Eń aldymen biliktilik deńgeiin, qandai salalarda adamdar arasynda bailanys bolatyndyǵyn eskerdik. Árine, bul belgili bir ýaqyt kezeńinde jumys isteýge tyiym salatyn qatań karantin is-sharalary engizilgen jaǵdaida ǵana. Baǵalaýymyzsha, 8,7 mln jumys kúshiniń ishinde 4,1 mln adam jumys oryndarynda qalady. Olar: TKSh, dárigerler, meditsina qyzmetkerleri, óndiristik kásiporyndar, aýyl sharýashylyǵy jumysshylary», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, bilim berý salasynyń, memlekettik organdardyń, keńselerdiń qyzmetkerleri qashyqtan jumys isteýge kóshirilýi múmkin. Olardyń sany shamamen 2,5 mln adamdy quraidy.
«Biz táýekel tobyna kirýi yqtimal dep 2 mln adamdy qarastyramyz. Biraq, munyń ózi de naqty jaǵdailarǵa bailanysty. Bul birinshi kezekte qyzmet kórsetý, saýda, kólik syndy salalardy qamtidy. Al eger jumys ornyn joǵaltýmen bailanysty jaitqa toqtar bolsaq, onda bizdiń esebimizshe 165 myń adam jumyssyz qalýy múmkin. Iaǵni, tolyqtai shekteý is-sharalary engizilgen jaǵdaida 165 myń qyzmetker jumysyn joǵaltady», - dedi Dáýlet Arǵyndyqov.
