QR Investitsiialar jáne damý ministrligi keshe QR Indýstriia jáne infraqurylymdyq damý ministrligi bolyp qaita qurylǵan bolatyn. Jańa vedomstvodaǵy ózgerister jaily onyń basshysy Jeńis Qasymbek aityp berdi.
«Bizden birneshe ókilet, fýnktsiia Syrtqy ister ministrligine ketti. Naqtyraq aitsaq, bul sheteldik investitsiialardy tartýǵa qatysty máseleler. Bunymen SIM ainalysatyn bolady. Jáne de biz memlekettik organdar arasyndaǵy eksportty damytý boiynsha máselelerdiń ara jigin ajyrattyq. Biz eksportty damytý jumysymen ainalysamyz, naqtylasaq, bizdiń ministrlik óńdeý ónerkásibi ónimderin eksporttaýmen ainalysady. Al SIM memlekettik organdardyń eksportty damytý boiynsha jumysyn úilestiretin bolady. Sebebi eksportpen Aýyl sharýashylyǵy ministrligi, Energetika ministrligi, barlyq salalyq ministrlikter ainalysady», - dedi Qasymbek Senat kýlýarynda bergen suhbatynda.
Vedomstvo basshysy ministrlik quramynyń ózgerisine qatysty málimet berdi. Onyń aitýynsha, ministrlikten Sheteldik investitsiialar komiteti men QazaqInvest kompaniiasy ketedi, olar SIM-ge ótedi.
«Bul ózgeriske deiin túrli usynystar talqylandy. Degenmen, bul jaily men de keshe sizdermen birge estidim. Sońǵy eki jylda álemde sheteldik investitsiialar naryǵy kúrt quldyrap ketti. Sondyqtan bul jerde belsendi jumys atqarý kerek. Bizdiń barlyq halyqaralyq ókildikterimizdi, elshilikterimizdi jáne taǵy basqany jumysqa tartý qajet. Endi elshilikterdiń negizgi fýnktsiialarynyń biri – eksportty damytyp, investitsiia tartý. Bul ádettegi halyqaralyq tájiribe, kóptegen halyqaralyq vedomstvo osy máselemen ainalysady. Menińshe, jan-jaqty saralanǵan bul ózgerister atalǵan máselelerge serpin beredi» - dedi Jeńis Qasymbek.
