Astanada ótip jatqan H «TransEýraziia-2017» kólik-tranzittik áleýet jónindegi halyqaralyq konferentsiiasynda QR Investitsiialar jáne damý ministri Jeńis Qasymbek eldiń logistikalyq áleýeti týraly sóz qozǵap, Qazaqstannyń alyp naryqtardy bailanystyratyn negizgi tranzittik el bola alatynyn málimdedi, dep habarlaidy «QazAqparat» tilshisi.
«Sarapshylardyń pikirinshe, álemdik kólik naryǵy dúniejúzilik ekonomikalyq belsendiliktiń shamamen 6% -yn quraidy. Al búkil álem boiynsha kóliktik kiris mólsheri 4,5 trillion dollarǵa jetken. Sonymen qatar, Eýraziia elderi álemdegi halyqtyń shamamen 65%, energiia resýrstarynyń 75%, JIÓ-niń shamamen 40% qamtyp otyr. Kóliktiń rólin baǵalamai qoiýǵa bolmaidy. Kólik salasy ulttyq básekege qabilettilik pen turaqty damýdyń negizgi faktorlarynyń biri bolyp tabylady. Sondyqtan, Qazaqstanda biz kóliktik logistikany damytýǵa erekshe nazar aýdaramyz», - deidi Jeńis Qasymbek.
Ministrdiń aitýynsha, sońǵy jyldary Qazaqstannyń JIÓ qurylymynda kóliktik qyzmetterdiń turaqty túrde ósip kele jatqany baiqalǵan. 2017 jyldyń jartyjyldyǵynyń qorytyndysy boiynsha kóliktiń JIÓ-degi úlesi 8,3% quraǵan.
«Qazaqstanda kóliktik infraqurylymǵa, logistikaǵa investitsiia salýǵa basymdyq beriledi. Sońǵy 9 jylda Qazaqstanda memlekettik investitsiialar, sheteldik jáne jekemenshik ulttyq investitsiialar kózinen kólik infraqurylymyna 26 mlrd AQSh dollary salyndy. Osy ýaqytqa deiin biz 1700 shaqyrym temirjol, 3 200 shaqyrym avtokólik jolyn saldyq. Kaspii teńizindegi porttardyń qýatyn ulǵaityp, Qazaqstanda 15 áýejaidy qaita jóndeýden ótkizdik. Nátijesinde barlyq salalar turaqty ósý dinamikasyn kórsetýde», - deidi ol.
Ministr sonymen birge, 2016 jyly Resei men Qytai arasyndaǵy halyqaralyq saýda-sattyq kólemi 69 milliard dollarǵa jetkenin aitady. Onyń sózine qaraǵanda, Qytai men Eýropalyq odaq arasyndaǵy 550 milliard dollardyń, Resei men Ortalyq Aziia arasynda 18,5 milliard dollardyń saýdasy jasalǵan.
«Bul bizdi de oilandyra túsedi. Bul naryqta Qazaqstan negizgi tranzittik el jáne Ortalyq Aziiadaǵy negizgi logistikalyq oiynshylardyń biri bola alady. 2020 jylǵa qarai Qazaqstan arqyly tranzittik konteinerlik tasymal kólemin 2 mln konteinerge jetkizýdi josparladyq. Bul biz úshin óte úlken mindet. Biz 2020 jylǵa qarai tranzitten túsetin túsimdi shamamen 5 milliard dollarǵa jetkizýdi kózdep otyrmyz», - deidi ministr.
Aita ketsek, búgin Astanada H «TransEýraziia-2017» kólik-tranzittik áleýet jónindegi halyqaralyq konferentsiia bastaldy. Oǵan Latviia, Litva, Túrkiia, Ázerbaijan, Resei, Belarýs elderinen 300-ge jýyq delegat qatysýda.
