Foto: Aqorda
Memleket basshysy Qasym-Jomart Toqaevtyń Japoniiaǵa resmi sapary mazmundy ári naqty nátijelerge toly boldy. Bul týraly Prezidenttiń baspasóz hatshysy Rýslan Jeldibai málimdedi, dep habarlaidy Ult.kz.
Sapar aiasynda Qasym-Jomart Toqaev Kúnshyǵys eliniń joǵary basshylyǵymen, jetekshi kompaniialardyń top-menedjerlerimen mazmundy kelissózder júrgizip, Japoniiada bilim alyp, eńbek etip júrgen qazaqstandyqtarmen kezdesti.
Investitsiia tartý baǵyty
Prezident japondyq iri kompaniialar men uiymdardyń basshylarymen birqatar mańyzdy kezdesýler ótkizdi. Olardyń qatarynda Mitsui transulttyq saýda kompaniiasy, Rakuten Group halyqaralyq tehnologiialyq konglomeraty, Sumitomo saýda-investitsiialyq korporatsiiasy, mashina jasaý salasyndaǵy álemdik alpaýyt Komatsu, qurylys jáne taý-ken tehnikasyn óndirýdegi jetekshi Hitachi Construction Machinery, sondai-aq Japoniianyń metall jáne energetikalyq qaýipsizdik jónindegi agenttigi bar.
Kelissózder barysynda ózara tiimdi yntymaqtastyqtyń keń aýqymdy perspektivalary talqylandy. Atap aitqanda, iadrolyq meditsinany damytý, asa mańyzdy mineraldardy barlaý, logistika men tsifrlandyrý, «jasyl» tehnologiialardy engizý, qurylys jáne taý-ken jabdyqtaryn óndirý, sondai-aq servistik qyzmet kórsetý salalaryna erekshe nazar aýdaryldy.
Joǵary deńgeidegi kezdesýler
Imperator Narýhito men Japoniia Premer-ministriniń Memleket basshysyn bir kúnde qabyldaýy Qazaqstan Prezidentiniń halyqaralyq arenadaǵy bedeliniń joǵary ekenin aiǵaqtady. Japon diplomatiiasynda mundai protokoldyq qadam sirek kezdesetin jaǵdai sanalady jáne meimanǵa kórsetilgen airyqsha qurmettiń belgisi retinde baǵalanady.
Sonymen qatar Qasym-Jomart Toqaev Tokio gýbernatorymen kezdesip, qala basqarý isinde Smart city tehnologiialaryn damytý jáne innovatsiialyq sheshimderdi engizý máselelerin talqylady. Kezdesý nátijesinde Qazaqstan men Japoniia astanalary arasynda ózara túsinistik jónindegi memorandýmǵa qol qoiyldy.
BUU ýniversitetindegi dáris
Memleket basshysy Tokiodaǵy BUU ýniversitetinde dáris oqydy. Bul da Prezidentke kórsetilgen erekshe yqylastyń kórinisi boldy. Dáris barysynda Qasym-Jomart Toqaev qazirgi geosaiasi ahýal, halyqaralyq arenadaǵy orta derjavalardyń róli, jasandy intellekt mańyzynyń artýy jáne Birikken Ulttar Uiymyn reformalaý qajettiligi týraly oi qozǵady.
Sondai-aq Prezident sý resýrstaryn basqarý máselesine arnaiy toqtalyp, bul baǵyttaǵy túitkilderdi sheshý úshin UN Water halyqaralyq uiymyn qurý jáne Almaty qalasynda BUU ýniversitetiniń óńirlik filialyn ashý jóninde bastama kóterdi.
Budan bólek, Memleket basshysy BUU ýniversitetinde Japoniianyń burynǵy Syrtqy ister ministri Ioriko Kavagýchimen beiresmi kezdesý ótkizdi.
Otandastarmen júzdesý
Qasym-Jomart Toqaev Japoniiada eńbek etip júrgen qazaqstandyqtarmen arnaiy kezdesip, olardyń jaǵdaiymen tanysyp, emen-jarqyn áńgimelesti.
«Ortalyq Aziia + Japoniia» sammiti
Sapar sońynda Memleket basshysy Ortalyq Aziia elderiniń basshylarymen birge «OA + Japoniia» formatyndaǵy alǵashqy sammitke qatysty. Sammit barysynda ózara tiimdi yntymaqtastyqtyń basym baǵyttary aiqyndaldy.
Prezident Qazaqstannyń Japoniiamen birlesken jobalardy tabysty iske asyrý úshin barlyq qajetti jaǵdaidy jasaýǵa daiyn ekenin atap ótti. Sondai-aq Japoniia Úkimetiniń Aqtaý portyndaǵy kedendik rásimderdi jetildirýge qatysý týraly sheshimin quptaitynyn jetkizdi.
Qazaqstan «jasyl» tehnologiialardy qoldana otyryp, dástúrli qýat kózderin igerý jáne óńdeý jobalaryna japon tájiribesin, innovatsiiasy men investitsiiasyn tartýǵa múddeli ekenin bildirdi. Sonymen birge Next-Generation SmartMining Plus jobasynyń iske qosylýyn qoldaitynyn atap ótti. Bul bastama sirek kezdesetin elementter men asa mańyzdy mineraldar óndirisin tsifrlandyrýǵa jáne ekologiialyq ornyqtylyqty arttyrýǵa baǵyttalǵan.
Budan bólek, Memleket basshysy ornyqty aýyl sharýashylyǵy salasynda japon ǵalymdary men sarapshylarynyń qatysýymen zertteý platformasyn qurýdy, sondai-aq Qazaqstanda Japoniia ýniversitetteri men bilim berý ortalyqtarynyń ókildikterin ashýdy usyndy.
Prezident JICA agenttiginiń Ortalyq Aziiadaǵy sý máselesin sheshýge qosqan úlesin joǵary baǵalap, sý únemdeý tehnologiialaryn engizý, ǵylymi zertteýler júrgizý, sý salasyn avtomattandyrý jáne tsifrlandyrý baǵyttarynda birlesken jumysty jalǵastyrýǵa shaqyrdy.
Sondai-aq atom energetikasy salasyndaǵy yntymaqtastyqqa erekshe nazar aýdaryldy. Qazaqstannyń álemdik iadrolyq otyn naryǵyndaǵy áleýetin Japoniianyń ozyq tehnologiiasymen ushtastyrý bul saladaǵy tabysty áriptestikke jol ashatyny atap ótildi.
Resmi sapar qorytyndysynda jalpy quny 3,7 milliard dollardan asatyn 60-tan astam ekijaqty qujatqa qol qoiyldy.
Prezidenttiń sheteldik saparlary Qazaqstan ekonomikasyna aitarlyqtai serpin berip, investitsiia tartýǵa, eksportty ulǵaitýǵa, jańa jumys oryndaryn ashýǵa, iskerlik bailanystardy nyǵaitýǵa jáne áýe qatynastary men vizasyz rejimderdi keńeitýge yqpal etedi.
