Elordada Qazaqstan Prezidenti Qasym-Jomart Toqaevtyń qatysýymen Aziia elderi qalamgerleriniń tuńǵysh forýmy jumysyn bastady, dep habarlaidy QazAqparat tilshisi.
Aziia elderi qalamgerleriniń tuńǵysh forýmy Aziia qurlyǵynda ornalasqan elder arasyndaǵy ádebi-mádeni bailanystardy nyǵaitý, odan ári damytý ári egemendi elimizdiń búgingi keskin-kelbetin, Qazaqstannyń ádebietin, rýhani qundylyqtaryn pash etý, ádebi úderistiń damýyna qatysty Aziia elderimen tájiribe almasý syndy maqsat-mindetterdi kózdeidi. Ádebi forýmnyń jalpy otyrysyna Nobel syilyǵynyń nominanttary Ońtústik Koreia qalamgeri Ko Yn, katarlyq Moza al-Malki, mońǵoliialyq Gombojavyn Mend Ooioo, Ońtústik Aziia halyqaralyq syilyǵynyń laýreaty úndistandyq Amar Mitra, Ázerbaijan halyq jazýshysy Anar Rasýl Rzaev baiandama jasaidy.
Forým jumysy 3 kúnge sozylady. Búgin sharanyń jalpy otyrysy ótip jatyr. Eki bólimde 11 spiker baiandama oqidy. Erteń TED.9 formatynda arnaiy shara ótedi. Onda 10 spiker dáris oqyp, erkin formatta suhbattasady. Sondai-aq, Abai kóshesiniń boiynda «Qalamgerler alleiasy» ashylady. Shara aiasynda Ortalyq Aziia qalamgerleriniń kezdesýi ótedi. Onda Uly Jibek joly boiyndaǵy ádebiettiń bolashaǵy týraly aitylady. Forým aiasynda jas Aziia qalamgerleriniń kezdesýi de josparlanǵan.
QR Prezidenti ákimshiligi men QR Mádeniet jáne sport ministrliginiń qoldaýyman ótetin shara 4-6 qyrkúiek kúnderine josparlanǵan. Forýmǵa sonymen qatar Býker jáne ASEAN syilyqtarynyń laýreattary, jazýshylar odaqtary men qaýymdastyqtarynyń tóraǵalarynan quralǵan 90 qonaq kelgen.
