Foto: Aqorda
Prezident, jýrnalister qaýymyn aldaǵy Buqaralyq aqparat quraldarynyń qyzmetkerleri kúnimen quttyqtap, ulttyq media – halyqtyń úni, al jýrnalist jasampazdyq jarshysy ekenin atap ótti, dep habarlaidy Ult.kz.
"Sizder memleket saiasatyn elge túsindirip, qoǵam men biliktiń arasynda kópir bolyp kelesizder. Elimizde jasalyp jatqan reformalardyń mán-maǵynasyn jurtshylyqqa jetkizip júrsizder. Bul – óte mańyzdy, kúrdeli, erekshe jumys. Árbir adamnyń qolynan kelmeidi. Men búgin bárińizge shynaiy rizashylyǵymdy bildiremin.
Qoǵamda pikir alýandyǵy ornyqty, iaǵni, óz oiyn zańǵa sáikes aita alatyn, kókiregi oiaý, órkenietti qoǵam ornyǵýda. Halqymyzdyń múlde jańa saiasi bolmysy qalyptasty. Zań men tártip tujyrymdamasy qoǵamymyzdyń sana-seziminiń ajyramas bóligine ainalyp jatyr", – dedi Memleket basshysy.
Memleket basshysy qazir arqany keńge salatyn ýaqyt emes ekenin aita kele, álemdegi geosaiasi, geoekonomikalyq ahýal shielenise túskenine toqtaldy.
"Jahandyq qaýipsizdik júiesi túbegeili ózgerip jatyr. Alpaýyt elderdiń teketiresi ýshyǵyp, keibir aimaqta qarýly qaqtyǵystar órship barady. Álemdik arenada kúrdeli, bizge beimálim, tereń túsinýdi qajet etetin úderister oryn alýda. Negizinde, halyqaralyq quqyqqa qatysty uǵymdar aralasyp ketti. Kúshtiniń quqy dáriptele bastady. Ǵalamdyq tsifrlyq transformatsiia búkil adamzatqa buryn-sońdy bolmaǵan qiyndyqtar ákeledi. Álem jańa dáýirge qadam basty.
Jasandy intellektiniń keńinen taralýy kez kelgen mamandyqqa, sonyń ishinde sizderdiń kásipterińizge de múldem jańa talaptar qoiady. Kóptegen sarapshylar keleshekte adam eńbegin algoritmder almastyratynyn aityp júr. Alaida bul ózgerister jýrnalistikanyń jańa múmkindikterin, shyn máninde ekinshi tynysyn ashýy ábden múmkin, – dedi Qasym-Jomart Toqaev.
Prezidenttiń aitýynsha, almaǵaiyp, bulyńǵyr zamanda, eń aldymen, el birligin saqtap, basty bailyǵymyz – turaqtylyq pen tynyshtyqty baǵalaý qajet.
"Jýrnalistiń aǵartýshylyq missiiasy aldyńǵy qatarǵa shyqty. Kez kelgen aqparatty muqiiat elep-ekshep, jurtqa durys jol kórsetý óte mańyzdy. Bul rette, sizderdi aqparat áleminiń temirqazyǵy deýge bolady. Men jýrnalisterimizdiń ár málimetti ult múddesi turǵysynan saralai alaryna senemin. Óitkeni ózim kóp oqimyn, sizder jazǵan maqalalarmen, oi-pikirlermen tanyspyn", – dedi Memleket basshysy.
Qasym-Jomart Toqaev búgingi jiynǵa aqparat salasynyń ardagerleri arnaiy shaqyrylǵanyna nazar aýdardy.
"Saýyq Jaqanova, Jarylqap Beisenbaiuly, Sharhan Qazyǵul siiaqty jýrnalistika maitalmandary ortamyzda otyr. Sizder ulttyq aqparat salasyn damytýǵa zor úles qostyńyzdar. Tilshilerdiń tutas býyny ózderińizge qarap ósti. Sizderge zor rizashylyǵymdy bildiremin. Qai salada bolsyn, adal eńbek laiyqty baǵalanýǵa tiis. Bul – bárimiz birge quryp jatqan ádiletti qoǵamnyń myzǵymas ustanymy", – dedi Prezident.
