QR Prezidenti Qasym-Jomart Toqaev RF Prezidenti Vladimir Pýtinmen telefon arqyly sóilesti, - dep habarlaidy Aqordanyń baspasóz qyzmeti.
Memleket basshylary birin-biri Uly Otan soǵysyndaǵy Jeńistiń 75 jyldyǵymen quttyqtady.
Qazaqstan Prezidenti atalǵan datanyń fashizmge qarsy iyq tiresip soǵysqan burynǵy Keńes Odaǵynyń barlyq halqy úshin asa mańyzdy ekenin atap ótip, eki eldiń ardagerlerine myqty densaýlyq, uzaq ǵumyr tiledi.
Resei Prezidenti Qazaqstan halqyna baq-bereke tilep, júrekjardy sálemin joldady.
Taraptar koronavirýs pandemiiasyna qarsy kúres máselesin talqylaý kezinde eki eldiń osy baǵytta tyǵyz yqpaldastyq ornatqanyn aitty.
Vladimir Pýtin Qazaqstan Úkimetiniń indetke qarsy kúres jónindegi sheshimderi men is-qimyldaryn Resei tarapy muqiiat baqylap otyrǵanyn jetkizdi. Osy rette Resei Prezidenti elimizde júrgizilip jatqan halyqqa, shaǵyn jáne orta bizneske qoldaý kórsetý sharalaryn joǵary baǵalap, barlyq is-árekettiń der kezinde qabyldanyp, tiimdi júzege asqanyn atap ótti.
Áńgime sońynda Qasym-Jomart Toqaev pen Vladimir Pýtin Joǵary Eýraziialyq ekonomikalyq keńestiń aldaǵy ýaqytta ótetin otyrysyna daiyndyq máselelerin talqylady.
