Foto: Aqorda
Memleket basshysy – Qazaqstan Qarýly Kúshteri Joǵarǵy Bas qolbasshysy Qasym-Jomart Toqaevtyń Uly Jeńistiń 80 jyldyǵyna arnalǵan áskeri paradta sóz sóilep, Uly Jeńistiń 80 jyldyǵymen quttyqtady, dep habarlaidy Ult.kz.
«Biyl Uly Jeńiske – 80 jyl! Barshańyzǵa Uly Jeńis kúni qutty bolsyn! Bul meiram – halqymyzdyń jaýyngerlik rýhynyń simvoly. Biz eldik úshin kúresken batyr babalardy ulyqtaimyz. Otan qorǵaý jolynda opat bolǵan bozdaqtarǵa taǵzym etemiz. Beibit kúndi qyraǵy kúzetip turǵan sarbazdarǵa qurmet kórsetemiz. Uly Otan soǵysy búkil adamzat úshin óte qiyn synaq boldy. Onyń zardaby kóptegen elge aýyr tidi, solardyń ishinde Qazaqstan da bar. Qaharly kúnder soǵystyń tek qasiret ákeletinin kórsetti. Beibitshiliktiń baǵa jetpes bailyq ekenin uǵyndyrdy. Uly Jeńis – tarihymyzdyń ajyramas bóligi jáne kúlli álem úshin úlken sabaq. Biz osy aqiqatty árdaiym este saqtaýymyz kerek. Zulmat kezeńdi bastan ótkergen maidangerler qazir ortamyzda otyr. Qurmetti ardagerler, barsha halyqtyń atynan Sizderge shyn júrekten alǵys aitamyn! Aǵa býynnyń óshpes erligi – urpaqqa ulaǵat. Otanshyldyǵy men janqiiarlyǵy – úlgi-ónege. Biz Uly Otan soǵysynyń ardagerlerin eshqashan umytpaimyz! Barshańyzǵa bas iemiz!», - dedi Prezident.
Memleket basshysy Uly Otan soǵysy jyldarynda maidanǵa 1 million 200 myńnan astam qazaqstandyq attanǵanyn eske saldy.
«Halqymyz Uly Jeńiske ólsheýsiz úles qosty. Uly Otan soǵysy jyldarynda maidanǵa 1 million 200 myńnan astam qazaqstandyq attandy. Olardyń teń jartysy erlikpen qaza tapty. Keler urpaqtyń jarqyn ári beibit keleshegi úshin óz ómirlerin qurbandyqqa shaldy. Dańqty ul-qyzdarymyz erliktiń ozyq úlgisin kórsetti. Qazaqtyń jaýjúrek ult ekenin pash etti. 500-den astam jaýyngerimiz Keńes Odaǵynyń Batyry atandy. Tyl eńbekkerleri soǵys jyldary jankeshtilik pen tabandylyq tanytty. Qazaqstannan maidanǵa bir jarym myń vagon kiim-keshek pen azyq-túlik jiberildi. Elimizge júzdegen kásiporyn kóshirildi, kóptegen jańa óndiris salyndy», - dedi ol.
Prezident 500-ge jýyq kóshege Qazaqstan qaharmandarynyń esimi beriletinin aitty.
«Biz Jeńistiń 80 jyldyǵyn atap ótýge basa nazar aýdardyq, elimiz boiynsha myńdaǵan mańyzdy, aýqymy keń is-shara ótkizilip jatyr. 500-ge jýyq kóshege Qazaqstan qaharmandarynyń esimi beriletin boldy. Elimizde qazaqstandyq maidangerlerge arnalǵan «Batyrlarǵa taǵzym» atty sherý ótedi. Adamzat tarihyndaǵy eń surapyl soǵysqa qatysýshylardyń urpaǵy atalarynyń sýretterin kóshelermen alyp júredi. Búgingidei jahandyq saiasatqa agressiia men qatygezdiktiń jegi qurty dendep engen kezeńde soǵystyń qasiretin elimizdiń barsha azamatyna túsindirý asa mańyzdy», - dep atap ótti Memleket basshysy.
Qasym-Jomart Toqaev Aibyndy armiia – Táýelsizdigimizdiń qorǵany ekenin eske saldy.
«Elimizdiń qorǵanys qabiletin arttyrý – asa mańyzdy mindet. Biz Qarýly Kúshterimizdi jańǵyrta bastadyq, armiiamyzdy kúsheitý úshin naqty jumys júrgizip jatyrmyz. Osy óte mańyzdy másele boiynsha Parlament zań qabyldady. Memleket áskeri qyzmetshilerge, arnaýly mekemeler men azamattyq qorǵanys salasynyń qyzmetkerlerine árdaiym qoldaý kórsetedi. Armiiamyzdyń kúsh-qýaty jaýyngerlik rýh pen temirdei tártipke tikelei bailanysty. Sizderdiń minsiz qyzmetterińiz – eldegi qaýipsizdik pen tynyshtyq kepili. Biz ozyq oily ult retinde zań men tártipti bárinen biik qoiatyn boldyq. Ár azamattyń boiynda Otanǵa degen adaldyq pen ádildik bolýǵa tiis», - dedi ol.
Qasym-Jomart Toqaev el qorǵaý – abyroily mindet jáne zor jaýapkershilik ekenin, bul – ár azamattyń perzenttik paryzy ekenin eske saldy.
«Sizdermen birge barsha azamattarymyz Ádiletti, Qýatty, Qaýipsiz jáne Taza Qazaqstandy quryp jatyr. Osy tarihi jumysymyz tabysty bolsyn! Rýhymyz myqty, memlekettiligimiz máńgi bolsyn! Kók Týymyz biikte jelbiresin! Qadirli Otandastar! Uly Jeńistiń 80 jyldyǵy qutty bolsyn!», - dep túiindedi sózin.
