QR Parlamenti senatynyń tóraǵasy Qasym-Jomart Toqaev úkimettiń jumysyn synǵa alyp, zań shyǵarý protsesindegi kemshilikterdi atady, dep habarlaidy "Ult aqparat".
«Parlamenttiń ókilettigin kúsheitý jumysy zań shyǵarýshy tulǵalardyń zań jobalaryn ázirleý jáne olarǵa bastamashylyq jasaý tártibin retteýdi talap etedi. Osy jerde birinshi másele týyndaidy. Bul - áli kúnge deiin ózgerissiz qalyp otyrǵan zań jobalaý jumysyn josparlaý deńgeiiniń tómendigi, ol zań shyǵarý jumysyndaǵy júiesizdikke, «shashyrańqylyqqa», ábden pisip-jetilgen túitkilderdiń tym kesh sheshilýine jáne kodifikatsiialanǵan aktilerdiń retsiz túzetilýine ákelip soǵady», - dedi Qasym-Jomart Toqaev.
Onyń aitýynsha, zań jobalarynyń jyldyń sońǵy ailarynda nemese sessiia aiaqtalatyn kezde usynylýy da - zań shyǵarý protsesiniń jetkilikti túrde uiymdastyrylmaýy men josparlanbaýynyń saldary. Parlament qabyldaǵan zańnamalyq aktilerge kúshine engen kezden bastap bir jyl ishinde basqa zańdar negizinde júzge jýyq ózgertýler engiziletin jaǵdailar da kezdesedi.
«Kóp jaǵdailarda bizdiń zańdarymyz ekonomika men qoǵam ómirindegi shuǵyl problemalardy sheshýge baǵyttalady. Sonyń saldarynan bul zańdardyń mazmunynda aǵymdaǵy jaǵdaiǵa degen tujyrymdamalyq kózqaras pen memlekettiń damýyna oń yqpal etetin úrdisterdiń tapshy ekeni birden baiqalady. Birqatar zańdardan ishki qarama-qaishylyqpen qatar teńgerimdiliktiń joqtyǵyn kórýge bolady. Zań bir uǵymnyń ózin alýan túrli maǵynada túsindirýi múmkin. Bul jaǵdai qoǵamnyń Parlament pen Úkimettiń qyzmetine degen syni kózqarasyn týǵyzary anyq», - dedi ol.
Senat spikeri elimizdiń zańnamalyq júiesindegi mańyzdy mindetterdiń biri Qazaqstandy damyǵan 30 eldiń qataryna engizýdi quqyqtyq qamtamasyz etý ekendigine de nazar aýdartty.
«Osy oraida, Úkimettiń joǵary reitingtik kórsetkishterge sai bolýǵa baǵyttalǵan tereń umtylysyn atap ótý qajet. Árbir memlekettik organ óz mindetterine ǵana sáikes keletin qaǵidattar men ádister negizinde halyqaralyq reitingterge qol jetkizý mindetin qoidy. Sonymen qatar, aldyńǵy qatarly damyǵan elderdiń tobyna kirý sharalary Úkimettiń barlyq organdarynyń osy baǵyttaǵy úilesimdi jumysyn qajet etedi. Halyqaralyq uiymdarmen is-qimyl jasaýdyń mańyzy zor ekeni kúmánsiz, biraq olardyń talaptary men suranystary, eń aldymen, ulttyq múddelerdi qamtamasyz etýge jáne Qazaqstan azamattarynyń muń-muqtajdary men qajettilikterin qanaǵattandyrýǵa baǵyttalǵan zań shyǵarý jumysyna tosqaýyl bolmaýy tiis», - dedi.
Q.Toqaevtyń paiymynsha, atalǵan protsesti anaǵurlym keshendi, úilesimdi jáne ony halyqaralyq qoǵamdastyqpen qatar elimizdiń azamattaryna uǵynyqty etý úshin onyń kezeńderi men sharttaryn quqyqtyq retteý máselesin qaraýymyz qajet.
Qasym-Jomart Toqaev Zań shyǵarý júiesiniń negizine qatysty teńgerimdi ustanymnyń bolmaýy - erekshe talqylaý men qarastyrýdy qajet etetin bólek taqyryp ekendigin de atap ótti.
«Máselen, keibir baǵyttar boiynsha biz qatańdatý ustanymdaryn basshylyqqa alsaq, basqa salalarda bosańdyq pen erkindikke jol beremiz. Osylaisha, tutastai Qazaqstannyń zańdary ózara ishki qisynnan ajyrap, sáikesinshe onyń quqyqtyq baǵdary zańǵa baǵyný, zańdy qurmetteý, quqyq buzýshylyqtardy azaitý siiaqty basty múddelerden alshaqtai túsedi. Onyń ústine, jynystyq qol suqpaýshylyqqa qarsy, esirtki quraldarynyń ainalymy men mal urlyǵy jáne adam ólimine ákelip soǵatyn jol qozǵalysy erejelerin saqtamaý salasyndaǵy quqyq buzýshylyqtardyń kóbeiýi olarǵa salynatyn jazany qatańdatýdy talap etedi», - dedi Senat Tóraǵasy.
Onyń aitýynsha, osyndai sipattaǵy qylmystar qoǵam ishinde ótkir pikirtalastar týdyrýda, sondyqtan da jeńil jaza qoldaný nemese, tipten, ózara kelisim jolymen (mediatsiia) qylmystyq jaýapkershilikten qutylý jaǵdailaryna azamattar tarapynan kelispeýshilik bildirý - zańdy qubylys.
«Úkimettiń osy máselege airyqsha mán berip, basa nazar aýdarýyn suraimyz»,- dedi Qasym-Jomart Toqaev.
