Foto: Aqorda
Úkimet pen ákimder jumys isteý tásilin túbegeili ózgertýi tiis. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy «Ult aqparat» Kazinformǵa silteme jasap.
«Aldaǵy mindetterdi oryndaý úshin Úkimetke de, ákimdikterge de tiisti quzyret berilgen. Alaida, bul múmkindikter kóp jaǵdaida durys qoldanylmai jatady. Sonyń kesirinen reformalardy júzege asyrý qarqyny báseńdep ketti. Mundaidy doǵarý kerek. Memlekettik organdar arasynda ózara kelisý men talqylaý jumysy aiaqtalǵansha, kez kelgen bastamanyń negizgi mán-mańyzy da ózgerip ketedi. Biýrokratiiany toqtatý qajet, bizge naqty nátije kerek. Úkimet pen ákimder jumys isteý tásilin túbegeili ózgertýge tiis. Jumys barysynda júieli ustanym bolýy qajet», - dedi Prezident.
Qasym-Jomart Toqaev máseleni jedel sheshýmen qatar, ekonomikanyń uzaqmerzimdi damýyn qamtamasyz etý óte mańyzdy ekendigin basa aitty.
«Qazirgi jaǵdaida ekonomikamyzdyń meilinshe erkin damýyna mán berýimiz qajet. Elimizdi damýdyń jańa belesine shyǵaramyz desek, bul jumysty jedel jáne dáiekti túrde júrgizgen jón. Men byltyrǵy Joldaýymda jańa ekonomikalyq saiasattyń negizgi baǵyttaryn aiqyndap berdim. Sondyqtan búgin men qazirgi ekonomikalyq ahýalǵa qatysty ózekti máselelerge toqtalamyn», - dedi Memleket basshysy.
