Erteń Prezident Qasym-Jomart Toqaev televiziia arqyly úndeý jasaidy, dep habarlaidy Memleket basshysynyń baspasóz hatshysy Berik Ýáli Facebook-tegi paraqshasynda.
Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty Memleket basshysy azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda 2020 jylǵy naýryzdyń 16-y, saǵat 08:00-den 2020 jylǵy 15 sáýir kúngi saǵat 07:00-ge deiin tótenshe jaǵdai engizdi.
Prezident tótenshe jaǵdai kezeńinde tótenshe jaǵdai rejimin qamtamasyz etetin Memlekettik komissiia qurdy. Onyń quramyna Premer-Ministr, birqatar joǵary memlekettik organ basshylary kirdi. Jarlyqqa sáikes, tótenshe jaǵdai kezinde mynandai sharalar men ýaqytsha shekteýler engiziledi.
1) qoǵamdyq tártiptiń saqtalýy, asa mańyzdy memlekettik jáne strategiialyq, erekshe rejimdik, rejimdik jáne erekshe qorǵalatyn obektilerdiń, sondai-aq halyqtyń tynys-tirshiligin jáne kólik qyzmetiniń jumys isteýin qamtamasyz etetin obektilerdiń kúzetilýi kúsheitiledi;
2) iri saýda nysandarynyń jumys isteýine shekteý qoiylady;
3) saýda oiyn-saýyq ortalyqtarynyń, kinoteatrlardyń, teatrlardyń, kórmelerdiń jáne adamdar kóp jinalatyn basqa da obektilerdiń qyzmetin toqtata turady;
4) karantin engiziledi, sanitariialyq-epidemiiaǵa qarsy aýqymdy is-sharalardy, onyń ishinde Qazaqstan Respýblikasy Qorǵanys ministrliginiń jáne ishki ister organdarynyń halyqtyń sanitariialyq-epidemiologiialyq salamattylyǵy salasyndaǵy qyzmetti júzege asyratyn qurylymdyq bólimsheleriniń qatysýymen júzege asyrylady;
5) oiyn-saýyq, sporttyq jáne basqa da buqaralyq is-sharalardy, sondai-aq otbasylyq, salt-dástúr is-sharalaryn ótkizýge tyiym salynady;
6) Qazaqstan Respýblikasynyń jáne shet memleketterdiń diplomatiialyq qyzmetiniń personalyn, sondai-aq, Qazaqstan Respýblikasy Syrtqy ister ministrliginiń shaqyrýymen Qazaqstan Respýblikasyna keletin halyqaralyq uiymdar delegatsiialarynyń múshelerin qospaǵanda, Qazaqstan Respýblikasynyń aýmaǵyna kóliktiń barlyq túrlerimen kirýge, sondai-aq onyń aýmaǵynan shyǵýǵa shekteýler belgilenedi.
Aita keteiik, Memleket basshysy erteń, iaǵni, 16 naýryz kúni televiziia arqyly úndeý jasaidy.
