Qazaqstan Prezidenti Birikken Arab Ámirlikteriniń kórnekti memleket qairatkeri jáne tanymal saiasatkeri, Qarjy jáne ónerkásip ministri Sheih Hamdan ben Rashid Ál Maktýmnyń dúnieden ótýine bailanysty BAÁ-niń Vitse-Prezidenti, Premer-Ministri, Dýbai ámirshisi Sheih Muhammed ben Rashid Ál Maktýmǵa kóńil aitý jedelhatyn joldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev Sheih Hamdan ben Rashid Ál Maktýmnyń qaitys bolǵany týraly sýyt habardy tereń kúizelispen qabyl aldy.
«Sheih Hamdan Ámirlikterdiń damýy men órkendeýi, halqynyń igiligi men múddesi jolyndaǵy uzaq jyldar boiy atqarǵan minsiz qyzmetiniń arqasynda zor qurmetke ie bolǵany barshaǵa belgili. Qazaqstan halqy da aǵańyz Sheih Hamdan Ál Maktýmdy ekijaqty qarym-qatynastardyń nyǵaiýyna súbeli eńbek sińirgen elimizdiń naǵyz dosy, tilektes baýyry retinde árdaiym esinde saqtaidy. Joǵary mártebeli Sheih Muhammed, orny tolmas aýyr qaiǵyńyzǵa ortaqtasyp, búkil qazaqstandyqtar men jeke óz atymnan Sizge jáne Ámirlikter halqyna kóńil aitamyn», – delingen jedelhatta.
